йавропа иттипақи русийә билән болған музакирәләрдә үстәлдә болушни тәләп қилмақта

түркийә авази радийоси хәвири:  йавропа иттипақи ташқи мунасивәтләр вә хәвпсизлик сийасәтлири алий вәкили җосеп боррел русийә әтрапида шәкиллиниватқан йеңи өзгиришләр үстидә тохталди.

у: «йавропа иттипақиниң бу талаш-тартишларниң айрилмас бир парчиси болуши керәклики наһайити рошән» деди.

йавропа иттипақи, русийә-америка вә нато үчбулуңида өткүзүлүш еһтимали болған һәр қандақ музакирәләрдә, үстәлдә болушини тәләп қилмақта.

бу һәқтики байанат, йавропа иттипақи ташқи мунасивәтләр вә хәвпсизлик сийасәтлири алий вәкили җосеп боррел тәрипидин елан қилинди.

у районниң нөвәттики вәзийити тоғрисидики йазмисида, дипломатийә охшаш ойлайдиған тәрәпләрниң һәмкарлиқи астида елип берилған әһвал астида әң йахши нәтиҗигә еришкили болидиғанлиқини тәкитлиди.

у мундақ деди:

«йавропа хәвпсизлик  бинакарлиқи һәққидики һәр қандақ талаш-тартишта, әлвәттә йавропа иттипақи үстәлдә болуши керәк. русийә ташқи ишлар министирлиқи ғәрбтин капаләт тәләп қилған тәклип лайиһәси, натониң йавропадики әзалириғиму мунасивәтлик. шуңа, йавропа иттипақиниң бу талаш-тартишларниң айрилмас бир парчиси болуши керәклики наһайити рошән. йавропа хәвпсизлик вә һәмкарлиқ тәшкилати русийә билән болидиған һәр қандақ учиришишқа асас болалайду.»

русийә америка билән натоға әвәткән хәвпсизлик капалити тәклипидә, натониң шәрққә бивастә кеңийиштин ваз кечиш тоғрисида вәдә беришни тәләп қилған иди.

русийә тәклипидә йәнә, американиң сабиқ советләр иттипақи дөләтлиридә вә натоға әза болмиған дөләтләрдә һәрбий база қурмаслиқни тәләп қилған иди.