авистиралийә америка билән һәр йили йүз милйон «mRNA» ваксинаси ишләпчиқириду
авистиралийәниң ковид-19 ға қарши күрәш даирисидә, америка доригәрлик ширкити «Moderna» билән һәр йили йүз милйон «mRNA» ваксинаси ишләпчиқириш тоғрисида келишим һасил қилғанлиқи билдүрүлди.
түркийә авази радийоси хәвири: австиралийә баш министири скот моррисон баш министирлиқниң рәсмий тор бетидә елан қилған йазма байанатида, викторийә иштатлиқ һөкүмити билән «Moderna» ниң ортақ тиришчанлиқи сайисида, 2024-йилдин етибарән һәр йили йүз милйон «mRNA» ваксинаси ишләпчиқиридиған муәссәсәниң викторийә иштатида қурулидиғанлиқини җакарлиди.
баш министир скот моррисон «mRNA» ваксинасиниң йуқум җәрйанида дунйадики әң чоң илмий байқаш икәнлики испатлиғанлиқини билдүрүп: «шуңа биз австиралийәликләрниң бихәтәрликини вә саламәтликини қоғдаш үчүн йалғуз ковид-19 ғила қарши әмәс, башқа нурғун йуқумлуқ кесәлликләргиму қарши бу хизмәтләрни қилиш (йәни ваксина ишләпчиқириш) муәссәсәлиригә игә болушни халидуқ» деди.
викторийә иштатиниң муавин баш министири җеймис мерлино: «бу пәқәт ваксина ишләпчиқиришқила мунасивәтлик әмәс, мәйли һазирқи вирус варийантлири болсун, мәйли кәлгүсидики йуқумлуқ кесәлликләр болсун, буниңдинму һалқиған һалда, ракни давалашқа вә кәм учрайдиған кесәлликләрни давалашқа пайдилиқ бир муәссәсә болуп қалғуси» деди.
