baydin: rusiye jiddiychilikni ulghaytsa iqtisadiy we bashqa tedbirler bilen jawab qayturulidu

türkiye awazi radiyosi xewiri: aqsaray baydin bilen putinning tünügün (2021-yili 7-dékabir) ki ikki saet dawamlashqan sinliq körüshüshi toghrisida yazma bayanat élan qildi.

bayanatta, pirézidént baydinning amérika we yawropadiki shériklirining, rusiyening ukraina chégrasigha esker yighishidin hés qilghan chong endishelirini tilgha alghanliqi bildürüldi.

bayanatta: «baydin rusiye ukrainada herbiy jiddiychilikni ulghaytqan ehwalda amérika we ittipaqdashlirining küchlük iqtisadiy we bashqa tedbirler bilen jawab qayturidighanliqini bildürdi» déyildi.

bayanatta, amérika pirézidénti baydinning ukrainaning igilik hoquqi we zémin pütünlükini qollaydighanliqlirini eskertkenliki, «jiddiychilikni peseytishni we diplomatiyege qaytish» ni chaqiriq qilghanliqi qeyt qilindi.

rusiye krémil sariyi élan qilghan yazma bayanatta, körüshüshning «ochuq» we «mesilige merkezleshken» körüshüsh bolghanliqi eskertilip, ikki rehberning 16-iyun (2021) shiwéytsariye paytexti jenwede ötküzülgen yighin qararlirining ijra qilinishini muzakire qilghanliqi bildürüldi.

bayanatta, 2015-yili imzalanghan minsk kélishimining ijra qilnishida «ilgirilesh bolmighanliqi» eskertildi.

bayanatta mundaq déyildi:

«nato ukraina zéminlirini charlashta xeterlik heriketlerni qilip, chégramiz etrapida herbiy yoshurun küchni tereqqiy qilduruwatidu.»

bayanatta, rusiye bilen amérika hemkarliqining «kishini razi qilidighan derijide emesliki» tekitlendi.

bildürülishiche, putin körüshüshte ikki dölet diplomatlirigha qoyulghan émbargolarni emeldin qaldurushni teklip qilghan.

ikki rehber amérika-rusiye istratégiyelik muqimliq diyalogi, intérnét tor bixeterliki, iran mesililirinimu muzakire qilghan bolup, qol astidikilirige bu mesililerni nazaret qilish toghrisida yolyuruq bergen.