blinkén we bir qisim palata ezaliri 29 - öktebir jumhuriyet bayrimini tebriklidi

türkiye awazi radiyosi xewiri: amérika tashqi ishlar ministiri antoni blinkén, 29 – öktebir jumhuriyet bayrimi munasiwiti bilen tebrik télégrammisi tarqitip, «türkiye shimaliy atlantik okyan ehdi teshkilati – nato ittipaqdishi we amérika qoshma ishtatlirining shérikidur» dédi.

amérikaning enqerediki elchixanisining tor bétide élan qilinghan télégrammida, blinkénning amérika namidin türkiye jumhuriyiti qurulghanliqining 98 yilliqini tebriklewatqan türk xelqini tebrikleydighanliqigha isharet qilindi.

«türkiye shimaliy atlantik okyan ehdi teshkilati – nato ittipaqdishi we amérika qoshma ishtatlirining shérikidur» dégen blinkén, türkiyening nechche on yildin buyan dunyawi qiyinchiliqlargha qarshi turush üchün amérika qoshma ishtatliri we xelqara jemiyetning yénida turup kelgenlikini qeyt qildi.

u, ikki döletning uzun yilliq munasiwitining soda, diplomatiye we bixeterlik saheliridiki küchlük hemkarliq üstige qurulghanliqini otturigha qoyup: «türkiye bilen amérika qoshma ishtatliri otturisidiki intayin chongqur xelqler arasi rishtini uzun yillardin buyan dawamlashturup kelgen bolup, bu munasiwitimizning küchi nuqtisidin halqiliq ehmiyetke ige. bu alahide künni tebriklewatqan silerge eng yaxshi tileklirimizni sunimiz we aldimizdiki yillarda shérikchilikimizni zoraytishni taqetsizlik bilen kütmektimiz» dédi.

yene bir tereptin, amérika awam palatasining amérika - türkiye munasiwiti we türk amérikaliqlar guruppisidiki palata ezaliri 29- öktebir jumhuriyet bayrimini tebriklidi.

mezkur guruppining teng hoquqluq bashliqliri ténnéssi ishtati palata ezasi stéw koxén, ohayo ishtati palata ezasi stéw chabot, wirginiye ishtati palata ezasi gérri konnoli we jenubiy karolina ishtati palata ezasi jow wilson türkiye jumhuriyiti qurulghanliqining 98 yilliqi munasiwiti bilen yazma bayanat élan qildi. «türk xelqi we türk amérikaliqlarning jumhuriyet bayrimini tebrikleymiz» dégen ibarilerge orun bérilgen bayanatta, türkiye jumhuriyitining 1923- yili 29- öktebir mustapa kamal atatürk teripidin qurulghanliqi eskertildi.

amérikadiki türklerning senet, ilim-pen, tetqiqat we soda dunyasigha nurghun töhpe qoshqanliqigha isharet qilinghan bayanatta: «türkiye yawropa, asiya we afriqaning késishish nuqtisidiki istratégiyelik ehmiyetke ige musulmanlar köp sanliqni teshkil qilidighan shimaliy atlantik okyan ehdi teshkilati – nato ezasi bir dölet bolush süpiti bilen, halqiliq ehmiyetke ige bir ittipaqdashtur. u chégra halqighan bixeterlik we térrorizmgha qarshi küreshte muhim rol oynaydu» dégen ibarilerge orun bérildi.

bayanatta yene, türkiyening dunyadiki eng köp musapirgha sahibxanliq qiliwatqan bir dölet ikenlikimu eskertip ötüldi.