afghanistandiki balilar acharchiliq sewebidin ölüm xewpi astida

türkiye awazi radiyosi xewiri: afghanistan paytexti kabuldiki indira gendi balilar doxturxanisida xizmet qilidighan mesul doxtur muhemmed emin sherefi kembeghellik sewebidin balilarning yéterlik ozuqlinalmaywatqanliqini we dölet teweside balilarning ehwalining xeterlik ikenlikini éytti.

u doxturxanida onlarche balining yéterlik ozuqlinalmasliqtin duchar bolghan késellik sewebidin dawalanghanliqini bildürüp: <<bu késelliklerning sewebi xelqning maddiy ehwalining nachar bolushidur. kishiler balilirini baqalmaywatidu. balilar yéterlik aqsil istémal qilalmighanliqi üchün ichi sürüsh we shuninggha oxshaydighan késelliklerge muptila boluwatidu. balilardiki acharchiliq we yéterlik ozuqlinalmasliq halsizlinishqa seweb bolidu >> dédi.

u dölettiki siyasiy muqimsizliqlar sewebidin idare-organlarda xizmet qidighanlarning texminen töt aydin buyan maash alalmighanliqini bildürüp: <<qish peslining yétip kélishi bilen késellikler köpiyidu. kishiler maashini alalmaywatidu. ishsizliq we kembeghellik yuqiri pellige chiqti. balilar xewp astida. xelqaraliq jemiyetlerdin afghanistan xelqige yardem qilishni telep qilimiz>> dédi.

kabuldin besh kilométir yiraqliqqa jaylashqan budxaq yézisida bezi aililer balilirigha nan tépishta qiynalmaqta.

yawropa ittipaqi tashqi munasiwetler we xewpsizlik siyasiti aliy wekili josép borrél düshenbe (2021-yili 11-öktebir) küni bayanat élan qilip: <<afghanistandiki insaniy we ijtimaiy iqtisadiy weziyet weyran bolushning bosughisigha yétip keldi. norwégiye musapirlar kéngishining melumatlirigha asaslanghanda, muwapiq yardemge érishelmigen teqdirde, eng az dégende 1 milyon bala bu qishning soghuqi we acharchiliq sewebidin ölüm xewpige duch kelgen. qarap turalmaymiz. derhal tézlikte heriketke ötüshimiz kérek>> dégen idi.