«amérika bilen nacharlishiwatqan munasiwet söhbetke selbiy tesir körsitishi mumkin»
xitay tashqi ishlar ministiri wang yi amérika qoshma ishtatliri bilen barghanséri nacharlishiwatqan munasiwetlerning kilimat özgirishi söhbetlirige selbiy tesir körsitish éhtimalliqining barliqi toghruluq agahlandurdi.
türkiye awazi radiyosi xewiri: xitay tashqi ishlar ministirliqining bildürüshiche, wang yi, amérika qoshma ishtatliri pirézidénti jo baydinning kilimat ishliri alahide wekili kéri bilen sinliq körüshken.
uchrishishta, kilimat özgirishi mesilisige dair munasiwetlerni téximu keng dairilik munasiwetlerdin ayrip qarighili bolmaydighanliqini eskertken wang yi, amérika qoshma ishtatlirini mewjut munasiwetlerni tereqqiy qildurush üchün qedem tashlashqa chaqirghan.
xitay kespdashliri bilen xitayning tyenjin shehiride kilimat söhbetliri toghruluq uchrishishlarda bolghan kéri, amérika qoshma ishtatlirining pütkül dunya bilen kilimat özgirishi mesiliside hemkarliq ornitish iradisining qetiylikini, hemde xitayni bulghima qoyup bérishni azaytish üchün qoshumche tedbir qollinishqa teshwiq qilghanliqini éytti.
xitayning yer shari téléwiziyesi torining xewirige qarighanda, kéri xitayning yer shari xaraktérlik kilimat özgirishige qarshi küresh tirishchanliqlirida «derijidin tashqiri halqiliq rol oynawatqanliqi» ni qeyt qilghan.
igilinishiche, parnik gazi qoyup bérish jehette, xitay dunya boyiche birinchi orunda, amérika qoshma ishtatliri ikkinchi orunda turidiken.
