taliban: xitay afghanistanni qayta qurushta zor rol oynishi mumkin
talibanlarning bayanatchiliridin suheyl shahin, xitayning afghanistanni qayta qurushta zor rol oynash éhtimalliqining barliqini éytti.
türkiye awazi radiyosi xewiri: shahin, xitayning merkiziy téléwiziye istansisi (CCTV) ning ziyaritini qobul qilghanda bergen bayanatida, afghanistanni qayta qurushning muhimliqini tekitlep mundaq dédi: «xitay ghayet zor iqtisadiy küchke ige qudretlik bir dölet bolup, afghanistanni qayta qurushta zor rol oynishi mumkin.»
qoshna eller, rayon döletliri we pütkül dunyani afghanistanni qayta qurushta rol oynashqa chaqirghan shahin, barliq döletlerning yardimige éhtiyajliq ikenliklirini qeyt qildi.
afghanistan xelqining iraisige hörmet qilinishi lazimliqini tekitligen shahin, xelqara jemiyetni talibanlarni resmiy étirap qilishqa chaqirdi.
talibanlarning afghanistandiki ilgirilishining «zorlap téngilghan bir hakimiyetke qarshi xelq qozghilingi» gha wekillik qilidighanliqini eskertken shahin, «talibanlarning téz sürette döletke hökümranliq qilishi, ularning hakimiyetni kontrol astigha élishlirini qanuniy küchke ige qilip berdi» dédi.
talibanlarning hakimiyiti astidiki afghanistanda ayallarning erkinliklirige dair endishilernimu ret qilghan shahin, ayallarning maarip we xizmet qilishqa munasiwetlik heq – hoquqlirini qoghdaydighanliqlirini ilgiri sürdi, hemde xelqaraliq iqtisadiy we maliye organlirini, yéngi hakimiyetke iqtisadiy yardem bérishke chaqirdi.
yekshenbe küni, paytext kabulni qorshaw astigha alghan taliban, pirézidént eshref ghénining döletni terk étishi we hökümet küchlirining paytexttin ayrilishidin kéyin, sheherni toqunushsiz halda kontrol astigha alghanidi.
