rusiye – amérika istiratégiyelik muqimliq yighini chaqirildi

türkiye awazi radiyosi xewiri: rusiye tashqi ishlar ministirliqi teripidin élan qilinghan yazma bayanatta bildürülüshiche, rusiye we amérika heyetliri, yadro qorallirini kontirol qilishni öz ichige alghan ikki dölet otturisidiki kélishmeslikler heqqide söhbet élip bérish üchün, shiwéytsariyening jenwe shehiride bir yerge jem bolghan. bu dairide,  ikki dölet hasil qilghan kélishimlerning dawami teriqiside, istiratégiyelik muqimliq mesiliside rusiye – amérika diyalogining yéngi basquchi ishqa ashurulghan.

rusiye heyitige, rusiye muawin tashqi ishlar ministiri sérgéy ryabkow, amérika heyitige, amérika qoshma ishtatliri muawin tashqi ishlar ministiri wéndi shérman riyasetchilik qilghan yighinda, ikki döletning istiratégiyelik muqimliq, qoral – yaraghlarning kontirol qilinishi we xirislarning azaytilishigha qarita tedbirler mesililirige qarita pozitsiyeliri muzakiriler qilinghan.

yighindin kéyin axbarat wasitiliri mensuplirigha bayanat bergen ryabkow, yighinning ünümlük ötkenlikini we buningdin  intayin xursen ikenliklirini eskertken, hemde ikki dölet otturisida qoral – yaraghlarning kontirol qilinishi saheside kirizis shekillengenlikini tekitlep mundaq dégen: «amérika qoshma ishtatliri ijabiy söhbet ötküzüshke teyyar. bu intayin ijabiy bir nuqtidur. yighingha, amérika qoshma ishtatlirining barliq organlirigha wekillik qilidighan bir heyet qatnashti. biz muhim mesililerde oxshimighan köz qarashlirimiz bar dep yekün chiqarduq. oxshash köz qarashtiki mesililernimu bayqiduq, buni tereqqiy qildurushni xalaymiz.»

tor bixeterliki saheside amérika bilen özara dawamliq pikir almashturup turuwatqanliqlirini bayan qilghan ryabkow, bu sahediki söhbetni dawamlashturushni xalaydighanliqliriini bildürgen.

engliye, firansiye we xitayning rusiye bilen amérika qoshma ishtatliri otturisida istiratégiyelik muqimliq mesilisidiki muzakirilerge daxil bolushqa teyyar emeslikini eskertken ryabkow, «biraq kéyinki muzakirilerde engliye bilen firansiyening yadro küchi mesililirining nezerge élinishi, bizge nisbeten muhim ishtur» dégen.

amérika qoshma ishtatliri bilen yéngi basquchluq yighinning séntebirning axirliri ishqa ashurulidighanliqini qeyt qilghan ryabkow, bu yighingha teyyarliq qilidighanliqliri we dawamliq xizmet ishleydighanliqlirini éytqan.