chawushoghlu bilen lawrow antalyada körüshidu
dölitimiz (türkiye jumhuriyiti) tashqi ishlar ministiri mewlüt chawushoghluning 30 – iyun (2021) antalyada rusiye tashqi ishlar ministiri sérgéy lawrow bilen körüshidighanliqi bildürüldi.
türkiye awazi radiyosi xewiri: rusiye tashqi ishlar ministirliqi bayanat élan qilip, chawushoghlu bilen lawrowning jenubiy kawkaz, ottura sherq, shimaliy afriqa, shundaqla afghanistan, ukraina, ottura asiya, sherqiy aqdéngiz we qara déngiz rayonlirigha alaqidar weziyet, hemde süriye we liwiye mesililiri toghrisida sözlishidighanliqini uqturdi.
uchrishishta ikki döletning soda we iqtisadiy hemkarliqining tereqqiyatigha munasiwetlik mesililerningmu muzakire qilinidighanliqigha isharet qilinghan bayanatta: «bu yil 1 - aydin 4 - ayghiche özara soda miqdari 2020 – yilining oxshash mezgildikige sélishturghanda %22.5 éship 9 milyard 100 ming dollargha yetti» dégen ibarilerge orun bérildi.
uchrishishta ikki döletning herbiy - téxnika we yuqiri téxnika sahesidiki hemkarliqningmu muzakire qilinidighanliqi eskertilgen bayanatta, kowid – 19 gha qarshi küresh, rusiyening kowid – 19 gha qarshi tereqqiy qildurulghan sputnik – w waksinisining türkiyede emlinishi we ishlepchiqirilishigha munasiwetlik nuqtilarningmu küntertipke kélidighanliqi qeyt qilindi.
türkiye bilen rusiye otturisidiki siyasiy diyalogning qoyuq ikenliki tekitlengen bayanatta, jumhur reis rejep tayyip erdoghan bilen rusiye pirézidénti wiladimir putinning bu yil alte qétim téléfonda sözleshkenliki eslitip ötüldi.
