б д т: һамас - исраилийә уруш тохтитиш келишими интайин назук

түркийә авази радийоси хәвири: бирләшкән дөләтләр тәшкилати (б д т) оттура шәрқ тинчлиқ мусаписи алаһидә вәкили тор венкесланд, исраилийә билән пәләстинлик гуруппилар оттурисида өткән ай һасил қилинған уруш тохтитиш келишиминиң «интайин назук икәнлики»ни ейтип агаһландурди.

тор венкесланд нйуйоркта б д т хәвпсизлик кеңиши әзалириға доклат берип: «исраилийә билән һамас оттурисидики дүшмәнликкә хатимә бериш нөвәттә интайин назук бир нуқтиға тайиниду, шуңа тәрәпләр қутратқулуқтин сақлинип җиддийчиликни пәскойға чүшүрүши керәк. ғәззәдә йәнә бир вәйран қилғуч сүркилиштин сақлиниш үчүн барлиқ тәрәпләр мәсулийитини ада қилиши лазим» деди.

б д т вәкили исраилийәни «хәлқара қанунда көрситилгән мәсулийәтлиригә мас һалда пәләстин хәлқиниң бихәтәрликини капаләткә игә қилиш»қа чақирди вә қайси тәрәпниң болушидин қәтийнәзәр, зораванлиқниң пилтисигә от туташтурғучиларниң җавабкарлиққа тартилишиниң шәрт икәнликини оттуриға қойди.

тор венкесланд, исраилийәни «пәләстинликләрниң өй – маканлири вә мал – мүлүклиригә зийан йәткүзүшни тохтитишқа, шундақла уларниң қанунлуқ һаләттә өй – маканлирини қуруп чиқишлириға рухсәт қилиш» қа чақирди.

у сөзи җәрйанида йәнә, пәләстинлик өктичи низар банатниң пәләстин хәвпсизлик күчлири тәрипидин тутқун қилинип узун өтмәйла вапат болушидин «күчлүк әндишә» қилғанлиқини билдүрүп, бу мәсилиниң очуқ – ашкара һаләттә тәкшүрүлүп, җавабкарларниң паш қилинишини тәләп қилди.

исраилийәниң муһасириси астидики ғәззәгә 10 – майда башлиған һуҗумлири, пәләстин исламий қаршилиқ көрситиш һәрикити – һамас билән һасил қилинған уруш тохтитиш келишимигә асасән, 21 – май шу җай вақти саәт 02:00 дә ахирлашқаниди.

исраилийәниң ғәззәгә қаратқан һуҗумлирида 66 си кичик бала, 39 и айал болуп, җәмий 254 пәләстинлик һайатидин айрилған, 1948 адәм йариланған, миңларчә бина йәр билән йәксан қилинған йаки ишләткили болмайдиған һаләткә чүшүп қалғаниди.