канададики йәрлик рәһбәрләр папаға наразилиқ билдүрди

түркийә авази радийоси хәвири: канадада йатақлиқ черкав мәктәплиридә җисний паракәндичиликкә вә зораванлиққа учриған балилар мәсилисидә папа франсискус (Franciscus) ниң әпу тилимигәнлики, йәрлик рәһбәрләрниң наразилиқини қозғиди.

«с т в нийус» (CTV News) ниң хәвиридә билдрүлишичә, папа франсискус әнәниви йәкшәнбә дуаси җәрйанида, католик черкавиниң йатақлиқ мәктәплиридики балиларни җинсий паракәндә қилишқа мунасивәтлик хәвәрләрдин биарам болғанлиқини билдүрүп, йәрлик хәлқләрниң һәқ-һоқуқлириға, мәдәнийәтлиригә һөрмәт қилишни чақириқ қилған. әмма у, канадалиқлар күтүватқан «әпу» ни тилимигән.

хәвәрдә қарашлириға орун берилгән саскатчеван (Saskatchewan) дики «игилик һоқуқлуқ йәрлик милләтләр федератсийәси» ниң башлиқи баби камерон (Bobby Cameron):

«һәммимиз азаблиниватимиз вә қайғуруватимиз. бу дунйада мәсхирә темисиға айланди. папаниң, ‹әйни вақитларда, черкавлиримизниң йәрлик хәлқләргә вә оқуғучилириға қилған муамилиси үчүн интайин қайғуримән. әпу тиләймиз, дуа қилимиз› дейиши шунчивала тәсму?» деди.

камлупс (Kamloops) һиндийанлар йатақлиқ черкав мәктипидин қутулған 72 йашлиқ са хил тут (Saa Hiil Thut) мәктәптики чағлирида бешидин өткәнләргә вә тартқан азап-оқубәтлиригә һечкимниң мәсул болмиғанлиқини билдүрүп: «җинайәтчиләр бир шәкилдә асан қутулуп қалиду. папа, ‹черкавимизниң йатақлиқ мәктәплиридә миңларчә җинсий паракәнчилик вә зораванлиқ вәқәләрниң йүз бәргәнликини аңлидим. камлупста вә канададики һәр бир йатақлиқ мәктәпләрдики намсиз мазарлиқларда 215 бала бар› демәйду» деди.

май ейи (2021) ниң ахирида бритиш колумбийа (British Columbia) дики камлупс һиндийанлар йатақлиқ черкавиниң бағчисида, тизимда йоқ 215 балиниң җәситиниң қалдуқлири тепилған иди.

канада баш министири җастин трудо (Justin Trudeau) өткән һәптә тәкрар елан қилған байанатида, мәктәпләрниң черкавниң контроллуқида икәнликини хатирилитип, ватиканниң мәктәпләрдики роли үчүн җавабкарлиқни үстигә елиши вә әпу тилиши керәкликини билдүргән иди.