liwiyediki musulman qérindashlar jamaiti xelqarliq paaliyetlirini toxtatti
liwiyediki musulman qérindashlar jamaiti özining «tirilish we islahat jemiyiti» dégen nam bilen adettiki bir ammiwi teshkilatqa aylanghanliqini élan qildi.
türkiye awazi radiyosi xewiri: jemiyetning ijtimaiy alaqe bétide élan qilinghan yazma bayanatta, «biz barliq liwiyeliklerge shuni jakarlaymizki, allahning iltipati we yardimi bilen musulman qérindashlar jamaitining islamda ottura hal yol tutush pozitsiyesige riaya qilish chaqiriqini qaytidin janlandurush üchün <tirilish we islahat jemiyiti> dégen nam bilen bir ammiwi teshkilatqa aylanghanliqimizni bildürimiz» déyildi.
bayanatta, bu qararning nurghun söhbet yighini we dialoglardin kéyin 11- nöwetlik qurultayda élinghanliqi, jemiyetning liwiyening herqaysi ammiwi organlirida jan tikip xizmet qilish arqiliq uchurni yetküzidighanliqi uqturuldi.
liwiyediki musulman qérindashlar jamaitining sabiq ezasi shundaqla jamaetning siyasiy qaniti, adalet we binakarliq partiyesi ezasi abdurrezzaq sergen, xizmetlerning peqet liwiye ichidila bolushi kérekliki heqqide qarar maqullanghanliqini, shu wejidin bir ammiwi teshkilatqa özgergenlikini éytti.
abdurrezzaq sergen bu qarar bilen jamaetning liwiye sirtidiki teshkilatlar bilen héchqandaq alaqisi qalmighanliqini, musulman qérindashlar teshkilati bilenmu xelqarliq jamaet bolush süpiti bilen héch qandaq baghlinishliqi yoqluqini we peqet dölet ichidila xizmet qilidighan bir jemiyetke aylanghanliqini tekitlidi.
