qatar seudi erebistanning tashqi siyaset chaqiriqini qollidi

türkiye awazi radiyosi xewiri: qatar tashqi ishlar ministiri muhemmed bin abdurrahman alsani twittérda, seudi erebistan weliehdi shahzadisining tünügün (2021-yili 28-aprél) qilghan chaqiriqini qollaydighanliqlirini bildürdi.

qatar tashqi ishlar ministiri alsani: «b d t kélishimlirige boysunush, döletlerning igilik hoquqigha hörmet qilish we ichki ishlirigha arilashmasliq, medeniyetlik döletlerning asasliri bolup, rayon we dunyaning tinchliq hemde bixeterlikini qoghdashning kapaliti hésablinidu. iranni öz ichige alghan rayonda diyalog we yaxshi qoshnidarchiliq pirinsipliri asaslirigha tayanghan tashqi siyaset chaqiriqini qollaymiz» dédi.

seudi erebistan weliehdi shahzadisi muhemmed bin selman resmiy téléwiziye qanilining ziyaritini qobul qilip: «iran qoshna dölet. biz iran bilen yaxshi munasiwet ornitishni arzu qilimiz» dédi.

seudi erebistan, ereb birleshme xelipiliki, behreyn we misir 2017-yili 5-iyun qatarni «térrorluq guruppilirini qollighanliqi» toghrisida eyiblep barliq diplomatik munasiwetlerni üzüp tashlighan bolup, bu döletke iqtisadiy émbargo yürgüzüshni bashlighan idi.

qatar eyibleshlerni ret qilghan we bu ehwal pars qoltuqi rayonida kirizisqa seweb bolghan idi.

seudi erebistan tashqi ishlar weziri faysal bin ferhan alsuud 5-yanwar (2021) elula shehiride ötküzülgen 41-nöwetlik pars qoltuqi hemkarliq kéngishi yighinida, qatargha émbargo yürgüzülgen döletlerning doha bilen diplomatik munasiwetlerni qaytidin ornatqanliqini we émbargoning emeldin qaldurulghanliqini élan qilghan idi.