seudi erebistanda hamas emeldari muhemmed el hudarining qamaqqa élinishi naraziliq qozghidi

türkiye awazi radiyosi xewiri: seudi erebistanda texminen 2 yildin buyan tutup turuliwatqan 83 yashliq hudarining tughqanliri we yéqinliri seudi erebistan padishahi salman bin abduleziz we weliehdi muhemmed bin selmangha naraziliq bildürüp, hudari we oghli hanini qoyup bérish chaqiriqida boldi.

hudarining inisi abdulmajid hudari bayanatida, «biz bu yerge seudi erebistanda türmige tashlanghan, zulum qilinghan, rak késel bir kishining barliqini pütün dunyagha anglitish üchün toplanduq» dédi.

abdulmajid hudari riyad hökümitige buningdin ilgirimu mesile toghrisida resmiy yazma yollighanliqini, emma téxiche jawab alalmighanliqini eskertti.

seudi erebistan bixeterlik qisimliri jidde shehiride turushluq hamas emeldari muhemmed el hudarini2019-yili 4-aprélda qolgha alghan idi.

hamas bayanatchisi hazim qasim 23-martta élan qilghan bayantida, hudarining sozulma xaraktérlik késelge giriptar bolghanliqini we salametlikining nacharlashqanliqini bildürgen idi.

hazim qasim hudarining héchqandaq jinayi eyiblesh yoq turughluq qolgha élinghanliqini we uning qilghan ishining peqet «pelestin dewasini we pelestin xelqining ishghaliyetchi israiliyege qarshi élip bérilghan qanunluq kürishini qollash» ikenlikini  tekitlep,  seudi erebistan hökümitini hudari we bashqa qolgha élinghan hamas meusllirini derhal qoyup bérishke chaqiriq qilghan idi.

hamas hudarining 2 yildin buyan seudi erebistan bilen bolghan munasiwetlerge mesul emeldari bolup xizmet qilghanliqini, hamas herikiti ichidimu yuqiri derijilik wezipilerni öz  üstige alghan kishi ikenlikini  bildürüp, chong oghli hanining héchqandaq seweb körsitilmestin tutup turuliwatqanliqini eskertken idi.

hamas herikitimu hudari we uning oghligha tutulghan bu pozitsiyening seudi erebistanda turushluq nurghun pelestinliklerge qarshi élip bériliwatqan seperwerlikning bir qismi ikenliki heqqide agahlandurushta bolghan idi.