baydin erdoghanni kilimat özgirishi bashliqlar yighinigha teklip qildi

türkiye awazi radiyosi xewiri: amérika qoshma ishtatliri pirézidénti jo baydin, jumhur reis erdoghanni kilimat özgirishi bashliqlar yighinigha teklip qilip mektup yolidi, hemde mektubida, «kowid – 19» yuqumining tesirige uchrighan türkiye puqraliri, aile tawabiatliri we pütkül türkiye xelqining derd – elemlirini ortaqlishidighanliqini eskertti.

bu ariliqta, widéo konférans wasitisi arqiliq chaqirilidighan kilimat özgirishi bashliqlar yighini heqqide jo baydin hakimiyiti teripidin élan qilinghan bayanatta, pirézidént baydinning jumhur reis erdoghandin sirt yene, rusiye pirézidénti wiladimir putin we xitay dölet reisi shi jinpingningmu yighingha teklip qilghanliqi bildürüldi.

bashliqlar yighinida, kilimat özgirishige qarshi téximu keskin küresh qilishning zörürlüki we iqtisadiy jehettiki paydiliq tereplirining tekitlinidighanliqi qeyt qilinghan bayanatta, mundaq déyildi: «glasgowda noyabir éyida chaqirilidighan birleshken döletler teshkilati kilimat özgirishi konféransidin ilgiri, bu yighin muhim burulush nuqtisi bolidu.»

amérika qoshma ishtatlirining sabiq pirézidénti donald tramp, 2017 – yili, iyun éyida amérika qoshma ishtatlirining «parizh kilimat kélishimi» din chékinidighanliqini uqturghan, 2019 – yili, 4 – noyabir küni bolsa kélishimdin resmiy ayrilghanidi.

baydinning yanwar éyida hakimiyet béshigha chiqishidin kéyin, washington, kélishimge tekrar daxil bolghanidi.