blinkén türkiyening natodiki ehmiyitini tekitlidi
amérika tashqi ishlar ministiri antoni blinkén türkiyening natogha bolghan sadiqliqining dawamlishishining hemmige paydiliq ikenlikini éytti.
türkiye awazi radiyosi xewiri: antoni blinkén nato tashqi ishlar ministirliri yighini üchün yétip barghan biryusséldiki nato merkizide, bash katip stolténbérg bilen ortaq axbarat élan yighini ötküzdi.
antoni blinkén: «bügün bu yerge amérikaning teshkilatqa bolghan tewrenmes sadiqliqini bildürüsh üchün keldim. amérika nato ittipaqdashlirini asas qilghan halda shériklik munasiwetlirini qaytidin bina qilishni xalaydu. burunqigha oxshash, bügünki tehditlermu küchlük we tesiri küchlük bolghanliqi üchün teshkilatni qaytidin janlandurushni xalaymiz» dédi.
u amérika we natoning türkiye bilen bolghan munasiwetliri üstide toxtalghanda: «türkiye uzun ötmüshimiz bolghan we biz ehmiyet bérip kelgen ittipaqdishimiz. türkiyening natogha bolghan sadiqliqining dawamlishishi hemmimizge paydiliq. amérika we nato türkiyeni özige yéqin tutushni xalaydu» dédi.
u xelqaraliq küchlerning afghanistandin chékinishige munasiwetlik bir soalgha: «bu heqte dawamliq muzakire qiliniwatidu. téximu muhim bolghini, men bu yerge bashqilarning sözlirini anglash we meslihetlishish üchün keldim. chünki ittipaqdashlar mushundaq qilidu» dep jawab berdi.
u amérika eskerlirining afghanistandin chékinishi toghrisida yene munularni bildürdi:
«afghanistangha birlikte kirduq, özara maslashtuq, shunga toghra waqitta birlikte chékinimiz. bu yerde ortaq söz bar, u bolsimu bille bolush. pirézidént jo baydin chékinishning axirqi küni bolghan 1-may (2021) gha yétishishning qiyin ikenlikini éytqan idi. biraq, amérika néme bolushtin qetiynezer, ittipaqdashlirining néme oylawatqanliqini bilip heriket qilidu.»
nato bash katipi stolténbérg afghanistandin chékinish qarari üstide toxtalghanda, birlikte qarar chiqirishning ehmiyitini eskertip, afghanistandiki tinchliq söhbetlirining afghanistandiki siyasiy mesililerni hel qilishning birdinbir yoli ikenlikini qeyt qildi.
amérikaning tinchliq söhbetlirini qaytidin janlandurush tirishchanliqliridin memnunluq hés qilghanliqlirini bildürgen stolténbérg, talibanning zorawanliqlarni toxtitishini we xelqaraliq térrorluq guruppilirini qollashtin waz kéchishni telep qildi.
