hindistanda ijtimaiy taratqulargha qarita yéngi belgilimiler yolgha qoyulidu

türkiye awazi radiyosi xewiri: hindistan éléktironluq we uchur téxnologiyeliri ministiri rawi shankar prasad (Ravi Shankar Prasad) bilen uchur we axbarat ministiri prakash jawadékar (Prakash Javadekar) paytext yéngi déhlida ortaq axbarat élan qilish yighini ötküzüp, «2021-yilliq uchur téxnologiyeliri qaidiliri» ning tüzülgenlikini bildürdi.

éléktironluq we uchur téxnologiyeliri ministiri rawi shankar prasad bu dairide, ijtimaiy taratqu shirketlirining telep qilinghanda «ziyanliq mezmunlarning» menbesini bildürüshi kéreklikini éytti.

u «ziyanliq mezmunlarning» dölet bixeterliki, jemiyet tertipi, parakendichilik we ziyanliq jinsiy mezmunlar qatarliqlarni öz ichige alidighanliqini bildürüp: «hökümet tenqidni we öktichilerning heq-hoquqini memnunluq bilen qarshi alidu, biraq ijtimaiy taratqu ishletküchilirining, taratqulardin qalaymiqan paydilinishqa qarshi erz-shikayetlirini yetküzeleydighan qurulmigha ige bolushi intayin muhim» dédi.

uchur we axbarat ministiri prakash jawadékar ijtimaiy taratqu munberlirining erz-shikayetlerge jawab bérilishi meqsitide hindistangha «wakaletchi» teyinlishi kéreklikini qeyt qildi.

hindistan hökümiti 2021-yili 8-féwral twittérdin dölet miqyasida bir qanche aydin buyan dawamlishiwatqan déhqanlarning namayishlirini tarqatqan 1 ming 178 adrésni taqiwétishni yaki tonglitip qoyushni telep qilghan idi.