moskwa yawropa ittipaqining rusiyege jaza yürgüzüsh qararigha naraziliq bildürdi
rusiye yawropa ittipaqi döletliri diplomatiye ministirlirining rus öktichi alékséy nawalniyni türmige tashlighanliqi seweblik rusiyeni jazalash qararigha inkas qayturdi.
türkiye awazi radiyosi xewiri: rusiye tashqi ishlar ministirliqi yazma bayanat élan qilip, «süniy» bahanilerge tayinip chiqirilghan bu «epsuslinarliq qarar»ning yawropa ittipaqi — rusiye munasiwitige ziyan yetküzgenlikini otturigha qoydi.
jaza qararining qayta- qayta tashlanghan xata qedem ikenlikini otturigha qoyghan rusiye, nawalniyni qoyup bérish chaqiriqlirining «qanunsiz», shundaqla «bimene» ikenlikini tekitlep: «bu bir rusiye puqrasi bolup, iqtisadiy jinayetler sewebidin dölitimizdiki rus mehkimisi teripidin eyiblendi» dédi.
rusiye tashqi ishlar ministirliqining bayanatining dawamida: «ultimatom, bésim we jaza qatarliq qanunsiz wasitilerning yawropa ittipaqining diplomatiye siyasitide yiltiz tartqanliqi kishini epsuslanduridu. yawropa ittipaqi xelqara sehnide öz aldigha heriket qilidighan qutup roligha ige bolushqa urunmaqta, biraq, buning shériklirige hörmet qilish, ularning ichki ishlirigha arilashmasliq pirinsipi we xelqara qanungha qetiy boysunush dairiside yolgha qoyulidighanliqini untup qaldi» dégen ibarilerge orun bérildi.
