tramp hakimiyetni yenggil ötküzüp béridighanliqini éytti
amérika pirézidénti donald tramp jo baydin hökümitige hakimiyetni «yenggil ötküzüp bérish» ni kapaletke ige qilidighanliqlirini eskertip, yéngi hökümetning 20-yanwar (2021) xizmitini bashlaydighanliqini éytti.
türkiye awazi radiyosi xewiri: pirézidént tramp charshenbe (2021-yili 6-yanwar) küni özini qollaydighan namayishchilarning kongrege bésip kirgenlikige naraziliq bildürülgendin kéyin, twittérda widéoluq uchur hembehirlidi.
u namayishchilarning kongrege bésip kirishini «nahayiti set hujum» dep atap, mundaq dédi: «barliq amérikaliqlargha oxshash, menmu zorawanliq, qanunsizliq we qalaymiqanchiliqlardin chöchüp kettim.»
pirézidént tramp weqeler bashlinip qisqa waqit ötkendin kéyin, tinchliqning ornitilishi üchün dölet muhapizet qisimliri we fédératsiye xewpsizlik qisimlirini wezipige qoyghanliqini eskertip: «amérika her qachan qanun döliti bolup keldi we mushundaq dawamlishidu» dédi.
u namayishchilarni qattiq eyiblep: «siler dölitinglargha wekillik qilmaysiler. qanunni ayaq-asti qilghanlar buning bedilini töleydu» dédi.
u amérikaning nahayiti qiyin bolghan saylam musapisidin chiqqanliqini bildürüp: «hazir jiddiychilik peseymidi. saylam seperwerlikige qatnashqan xadimlar saylam netijilirige naraziliq bildürüp, barliq qanuniy yollardin paydilandi. birdinbir meqsitim saylamning bixeterlikini kapaletke ige qilish idi. men amérika démokratiyesini qoghdash üchün tirishtim» dédi.
u amérikadiki saylam sistémisini islah qilishning shert ikenlikini tekitlep: «hazir kongre saylam netijilirini testiqlidi. yéngi hökümet 20-yanwar xizmitini bashlaydu. emdi méning meqsitim, hakimiyetni tertiplik we kemchiliksiz ötküzüp bérish basquchini kapaletke ige qilish» dédi.
u 2020-yilining amérika üchün nahayiti qiyinchiliqqa tolghan mezgil bolghanliqini we özlirining qolidin kélidighan barliq tirishchanliqlarni körsetkenlikini eskertip: «qedirlik qollighuchilirim, bilimen ümidsizlendinglar, emma katta seperning yéngidin bashlanghanliqini bilishinglarni soraymen» dédi.
6-yanwar aqsarayning aldida ötküzülgen yighilishta trampning nutqini anglighandin kéyin, kongre binasigha qarap mangghan minglarche tramp qollighuchiliri bilen saqchilar arisida toqunush chiqti. saqchilarning tosuqlirini bösüp ötken bezi namayishchilar kongre binasigha bésip kirdi. weqelerde töt kishi jénidin ayrildi we nurghun kishi yarilandi.
