iranda yadro paaliyetlirige munasiwetlik teklip maqullandi

türkiye awazi radiyosi xewiri: iran fars agéntliqining xewiride bildürülishiche, konsérwatiplar köp sanliqni igileydighan parlaméntta maqullanghan «émbargolarning emeldin qaldurulushi we iran dölitining menpeetlirini qoghdash üchün istratégiyelik heriket pilani» dep nam bérilgen qanun layihesi, eng axirqi testiq orgini bolghan «asasiy qanunni qoghdighuchilar kéngishi» teripidin tekshürülüp testiqlanghandin kéyin, hökümetke ewetip bérildi.

iran parlaméntining heyet ezasi ehmet emirabadi, parlamént bashliqi muhemmed bakir kalibafning qanunni ijra qilish üchün pirézidént ruhanigha ewetip bergenlikini bildürdi.

iran alimi muhsin fahrizade süyiqestidin kéyin, parlaméntta testiqlanghan qanun, iran atom énérgiyesi idarisining uranni eng az dégende %20 qoyuldurushni bashlishini we töwen sewiyede qoyldurulghan uran zapisini köpeytishni mejburiy qilidu.

yadro kélishimi, irangha uranni eng köp bolghanda %3.67 qoyuldurushqa ruxset qilatti.

iran testiqlanghan qanun ramkisida, yadro kélishimining terepdarliri ikki ay ichide iranning bankachiliq sistémilirini we néfit éksportini normallashturidighan qedemler tashlimighan ehwalda, yadro qorallirining kéngiyip kétishini aldini élish dairiside 2016-yilidin buyan xalisane ijra qiliniwatqan qoshumche kélishimdinmu ayrilidu.

téhran hökümiti qoshumche kélishim boyiche, xelqara atom énérgyesi agéntliqi teptishlirining iran yadro eslihelirini xalighanche tuyuqsiz tekshürüshige ruxset qilghan idi. iranning qoshumche kélishimdin ayrilishi, xelqara atom énérgyesi teptishlirining tekshürüshlirige chek qoyulidighanliqini bildüridu.

pirézidént hesen ruhanini öz ichige alghan yuqiri derijilik hökümet mesulliri qanun layihesining testiqlanmasliqi üchün chaqiriqlarni qilghan idi.

hesen ruhani: «parlaméntta qobul qilinghan layiheni diplomatik paaliyetlerning musapisi üchün ziyanliq dep qaraymiz. hökümet bu layihege ijabiy qarimaydu» dégen idi.