йәмәндә 12 милйондин артуқ өсмүр ачарчилиқ вә кесәллик сәвәбидин җан талишиватиду
йәмәндә ачарчилиқ сәвәбидин 12 милйондин артуқ өсмүрниң инсанпәрвәрлик йардимигә моһтаҗ икәнлики билдүрүлди
түркийә авази радийоси хәвири: бирләшкән дөләтләр тәшкилати балилар фонди (UNICEF) ниң башлиқи һенретта фор рәсмий орган торида елан қилған байанатида, йәмәнниң йеқинқи йиллардин буйанқи әң еғир ачарчилиққа дуч кәлгәнликини тәкитлиди.
һенретта фор йәмәннниң вәзийитигә мунасивәтлик «хәтәр қоңғуриқиниң толиму узундин буйан челиниватқанлиқини» билдүрүп, «12 милйондин артуқ кичик бала инсанпәрвәрлик йардимигә моһтаҗ» деди.
озуқлуқ йетишмәслик нисбитиниң йәмәнниң бәзи җайлирида әң йуқири сәвийигә йәткәнликини тилға алған фор: «5 йаштин төвән 325 миңдин артуқ кичик бала озуқлуқ йетишмәслик сәвәбидин җан талишиватиду» дәп агаһландурушта болди.
фор йәмәндики бәш милйондин артуқ балиниң «йуқири дәриҗидики холера вә ич сүрүш кесәллики хәвипигә дуч кәлгәнликини» тәкитлиди.
һенретта фор йәмәндә бурундинла давамлишип келиватқан намратлиқ вә тәрәққий тапмаслиқниң үстигә йеқинқи бәш йилдин буйан давамлишиватқан тоқунушларниң балилар вә аилиләрни зораванлиқ вә кесәллик долқуниға сөрәп киргәнликини тәкитләп, «ковид -19 йуқуми бу чоңқур кризисни мушу йеқинда чоң апәткә айландурди» деди.
һенретта фор бирләшкән дөләтләр тәшкилати балилар фонди (UNICEF) ниң нәччә йилдин буйан йәмәнгә йардәм бериш паалийәтлирини елип бериватқанлиқини әскәртип, тәшкилатниң бу йил инсанпәрвәрлик йардими үчүн еһтийаҗлиқ болған 535 милйон доллардин 237 милйон доллирини қолға кәлтүрәлигәнликини тәкитлиди һәмдә қошумчә иқтисадий мәнбәгә еһтийаҗлиқ икәнликини қәйт қилди.
