бозқир: сақлиниватқан мәсилиләр дийалог арқилиқ һәл қилиниши керәк
бирләшкән дөләтләр тәшкилатиниң 75 – нөвәтлик омумий кеңишиниң башлиқи волқан бозқир, шәрқий ақдеңизда түркийә вә гиретсийә оттурисидики сақлиниватқан мәсилиләрниң дийалог, дипломатик вә тинч йоллар арқилиқ һәл қилиниши лазимлиқини ейтти.
түркийә авази радийоси хәвири: бозқир, бирләшкән дөләтләр тәшкилати омумий кеңишида өткүзүлгән мурасимда вәзипә өткүзүвалғандин кейин ишқа ашурулған ахбарат елан қилиш йиғинида, келәр һәптә башлинидиған бирләшкән дөләтләр тәшкилати башлиқлар йиғини вә муһим ишлар күнтәртипи һәққидә мәлумат бериши җәрйанида, шәрқий ақдеңизда түркийә билән гиретсийә оттурисидики сүркилишләргә алақидар бир соалға җаваб бәргәндә мундақ деди: «өзгиришләрни йеқиндин көзитиватимән. пиринсип бойичә ейтқанда, бундақ мәсилиләр дийалог, дипломатик вә тинч йоллар арқилиқ һәл қилиниши лазим. түркийә билән гиретсийә шималий атлантик әһди тәшкилатиға әза иттипақдаш дөләтләр болуп, икки дөләт оттурисидики мәдәнийәт вә иқтисадий мунасивәтләр интайин күчлүктур. мениң таллаш йолум шуки, әлвәттә дунйада вә районда тинчлиқ вә муқимлиқниң ишқа ашурулушидур.»
у йәнә, бирләшкән дөләтләр тәшкилатиниң 75 – нөвәтлик омумий кеңәш йиғинлири әснасида, «вухән вируси» темилиқ мәхсус йиғин чақирилидиғанлиқини, әмма йиғин вақтиниң техичә ениқ бекитилмигәнликиниму сөзлиригә илавә қилди.
