помпейо иранниң уран запаслаш миқдариниң нормидин он һәссә ешип кәткәнликини илгири сүрди
америка ташқи ишлар министири майк помпейо, иранниң уран записиниң ғәрб дөләтлири билән түзүлгән «бирләшмә универсал һәрикәт пилани» намлиқ йадро келишими һәққидә тохталди.
түркийә авази радийоси хәвири: америка ташқи ишлар министири майк помпейо, иранниң уран записиниң ғәрб дөләтлири билән түзүлгән «бирләшмә универсал һәрикәт пилани» намлиқ йадро келишимидә көрситилгән миқдардин 10 һәссидин көп ешип кәткәнликини оттуриға қойди.
помпейо тивиттерда иранниң уран ечиш хизмәтлири һәққидә йазма байанат елан қилди.
теһран даирилириниң, бирләшмә универсал һәрикәт пиланида көрситилгән әң йуқири уран записи өлчимидин 10 һәссә ешип кәткәнликини илгири сүргән майк помпейо, фирансийә, германийә вә италийәни тилға елип, «мәзкур үч дөләт вә башқа дөләтләр йадро келишиминиң тарихий икәнлики (чүши)дин ойғинип, (иранға) техиму техиму еғир җаза йүргүзүш мәсилисидә бизгә қошулуши керәк. бесим вә әтраплиқ сөһбәтлишиш бирдинбир йолдур» деди.
«бирләшмә универсал һәрикәт пилани» намлиқ йадро келишими, иранниң йадро һәрикитини назарәт қилиш вә қелиплаштуруш, буниң бәдилигә җазаниң бикар қилинишини көзләп, 2015 - йили бирләшкән дөләтләр тәшкилати хәвпсизлик кеңишиниң даимий әзалири америка, әнгилийә, фирансийә, русийә вә хитай шундақла германийә вә йавропа иттипақи билән иран оттурисида имзаланғаниди.
америка пирезиденти доналд трамп һакимийәт бешиға чиққандин кейин, вашингитон келишимдин чекинип, иранға җаза йүргүзүшкә башлиди.
америка, б д т хәвпсизлик кеңишиниң 13 йилдин буйан иҗра қилинип келиватқан, 18 – өктәбирдә муддити тошидиған қорал ембаргосиниң муддитини узартишни халайду.
