трамп латин америкадики бир қанчә дөләтни әйиблиди
америка пирезиденти доналд трамп әл салвадор, гиватемала, һондурас вә коломбийә қатарлиқ дөләтләрдин америкаға җинайәтчиләрниң кәлгәнликини, коломбийәдә зәһәрлик чекимлик содисиниң %50 өрлигәнликини илгири сүрди.
түркийә авази радийоси хәвири: коломбийә таратқулиридики хәвәрләрдә билдүрүлишичә, пирезидент трамп тексаста өткүзүлгән бир паалийәттә сөз қилғанда, бир қанчә күн бурун охшаш мәсилидә тәнқид қилған коломбийәни йәнә қайта тәнқид қилған. у коломбийәдин башқа, әл салвадор, гиватемала вә һондурас қатарлиқ дөләтләрдин америкаға қара гуруһ әзалириниң киргәнликини илгири сүрүп мундақ дегән:
«қара гуруһларни өзлириниң дөлитидә халимайдиғанлиқи үчүн қатилларни бизгә әвәтиватиду, чүнки америка хәлқини әхмәқ, шуңа уларни қобул қилиду дәп ойлайду.»
пирезидент трамп бир қанчә күн бурун қилған сөзидә, коломбийә пирезиденти иван дуге (Ivan Duque) һәққидә: «йахши адәм, әмма зәһәрлик чекимлик әткәсчиликигә зәрбә бериштә һечнимә қилмайватиду» дегән иди.
у иван дуге пирезидент болған авғуст ейидин башлап зәһәрлик чекимлик содисиниң %50 өрлигәнликини илгири сүрди.
иван дуге коломбийәдә хәвпсизлик қисимлири билән көрүшкәндә, зәһәрлик чекимлик әткәсчилики үстидә тохталди. у коломбийәниң зиммисигә чүшкән вәзиписини ада қиливатқанлиқини, хәлқи йуқири миқдарда зәһәрлик чекимлик истемал қилидиған дөләтләрниңму бу мәсилидә күрәш қилиши керәкликини билдүрди.
коломбийәниң һакимийәт бешидики партийә һесаблинидиған «демократик мәркәз» ниң рәһбири вә сабиқ пирезидент әлваро урибә (Alvaro Uribe) му трампниң әйибләшлири үстидә тохтилип, американиң зәһәрлик чекимлик әткәсчиликигә зәрбә бериштә коломбийәдин техиму йахши иттипақдаш тапалмайдиғанлиқини әскәртти.
