hindonéziyede arakan musulmanlirini qollap namayish ötküzüldi

türkiye awazi radiyosi xewiri: rohingya hemkarliqi milliy komitétining hindonéziyening paytexti jakartada ötküzgen namayishida, birmaning arakanliq musulmanlargha yürgüzgen qetliamlirigha naraziliq bildürüldi؛ namayishqa ishtirak qilghan rohingya hemkarliqi milliy komitéti bash katipi ibnulxajar bayanat bérip, «birma hökümitini yardem qilishqa yol qoyushqa chaqirimiz. hindonéziye hökümitiningmu kishilik hoquqni depsende qilghan birma bilen diplomatik munasiwetlirige xatime bérishini telep qilimiz» dédi.

u, birleshken döletler teshkilati (b d t) ni étnik tazilash, insaniyetke qarshi sadir qilinghan jinayetler we urush jinayetliri boyiche arakanda sadir qilinghan qanunsizliqlargha qarshi turush charilirini yolgha qoyushqa chaqiridighanliqlirini bildürdi.

b d t ning sanliq melumatlirigha qarighanda,  2017 - yili 25 – awghusttin buyan arakandin qéchishqa mejbur bolup qélip bangladéshqa kelgenlerning sani 725 minggha yetken. xelqara kishilik hoquq teshkilatliri süniy hemrah körünüshlirini tarqitip yüzlerche yézining weyran qilip tashlanghanliqini delillidi.

bangladésh, tewelikidiki arakanliq musulmanlarning yurtlirigha qaytishi üchün birma hökümiti bilen tüzgen kélishimni ijra qilishtin waz kechti, xelqara taratqular we yardem organlirining arakan rayonigha kirishini éghir derijide chekligen birma hökümiti, arakanliq musulmanlarning qaytishlirigha alaqidar wediliride turmidi.

b d t we xelqara kishilik hoquq teshkilatliri, arakanliq musulmanlargha qaritilghan zorawanliqni «étnik tazilash» yaki «irqiy qirghinchiliq» dep atimaqta؛ kishilik hoquq teshkilatliri, arakanliq musulmanlarning tégishlik bixeter muhit yaritilmay turup yurtlirigha qaytishlirining yéngi bir étnik tazilash dolqunini peyda qilishidin endishe qilmaqta.