австрийәдә һөкүмәткә қарши кәң көләмлик намайиш өткүзүлди

түркийә авази радийоси хәвири: австрийәниң пайтәхти вийанада тәхминән 20 миң киши, оңчил милләтчи австрийә хәлқ партийәси билән ашқун милләтчи әркинлик партийәсидин тәшкил тапқан бирләшмә һөкүмәтниң чәт әллик, мусулман вә көчмәнләргә қарши сийаситигә қарши намайиш өткүзди.

баш министирлиқ бинаси алдиға йиғилған тәхминән 20миң киши «һазир бирләштуқ, насситлар вә бирләшмә һөкүмәткә қаршимиз, ички ишлар министири һеберт истепа бәргин»дегән мәзмунда шоарлар товлашти.

австрийәдә 2000-йили  қурулған оңчил милләтчи австрийә хәлқ партийәси билән ашқун милләтчи әркинлик партийәсидин тәшкил тапқан бирләшмә һөкүмәткә қарши өткүзүлгән намайишта, һөкүмәтниң чәт әллик, мусулман вә көчмәнләргә қарши сийаситигә наразилиқ билдүрүлди.

намайишта сөз қилған сәнәтчи стефане сорийал җәмийәттә йүз бериватқан ирқчилиқ һадисилирини мисал көрситип, һазирқи бирләшмә һөкүмәтниң австрийәдә күндин-күндин әвҗ еливатқан ирқчилиқ вә дүшмәнлик хаһишиниң җавабкари икәнликини ейтти.

сорийал охшимиған кимлик вә мәдәнийәткә тәвә кишиләрниң ирқчилиқ һуҗумлириға дуч келиватқанлиқини әскәртип, мәмликәт ичидә мөтидил кишиләрниң йәнила ашқун милләтчи кишиләргә қариғанда көп икәнликини, бу сәвәбтин һәммәйләнниң бирликтә һәрикәт қилиши лазимлиқини әскәртти.

җәмийәттә дүшмәнлик, ирқчилиқ вә зорванлиқ хаһишиниң күчийиватқанлиқини ейтқан сәнәтчи сорийал: әпсус бу һөкүмәт инсанларни синипқа айримақта ирқчилиққа шараит йаритип бәрмәктә, җәмийәттики хилму хиллиқни йоқ қилмақта, деди.

омас геген речтс исимлик аммиви тәшкилатниң байанатчиси моника салзерму һазирқи һөкүмәт сәвәбидин австрийәдә фашизмниң баш көтүргәнликини әскәртип: настларниң дәвригә шаһит болған бири болуш сүпитим билән йашларниң келәчики вә арзулири үчүн ашқун милләтчи һөкүмәткә қарши елип бериливатқан күрәшләрни адаққичә қоллаймән, деди.

баш министир себастийан курзниң җәмийәттә йүз бериватқан сәлбий һадисиләрни бир тәрәп қилиштин аҗиз келиватқанлиқини ейтқан салзер, ашқун милләтчи министирларниң җәмийәттә баш көтүргән демократийәгә зит әһвалларға сүкүт қилип келиватқанлиқлирини ейтти.

намайиш нурғун аммиви җәмийәтниң вәкиллири сөз қилғандин кейин ахирлашти.