تورکیه‌ده نورماللاشما دؤنمی باشلاییر
کونسرت، فستیوال، گنجلیک کمپی کیمی فعالیتلره، تعیین اولونان اساسلارا اویولما‌سی شرطی ایله ایجازه وئریله‌جک
تورکیه، یئنی نسیل کوروناویروسلا مبارزه‌ده، ۱ جولایدا مرحله‌لی نورماللاشما دؤنمینین اوچونجو آشاماسینا گئچیر.
ایچ‌ایشلری باخانلیغی مرحله‌لی نورماللاشمانین اوچونجو آشاماسینا باغلی یازی یاییملادی.
بونا گؤره، کوچه‌یه چیخما و شهرلرآراسی سیاحت قیسیدلامالاری ۱ جولایدان اعتباراً سونا چاتاجاق.
یازییا گؤره، تدبیرلر چرچیوه‌سین‌ده فعالیتلرینه آرا وئره‌ن بوتون ایش یئرلری ایله سینمالار ۱ جولایدان اعتباراً تکرار آچیلاجاق.
بوتون ایش یئرلری ۱ جولایدان اعتباراً، ایش رخصت سندلرین‌ده‌کی تعیین اولونموش آچیلیش-باغلانیش ساعاتلاری آراسین‌دا خیدمت وئره‌بیله‌جک.
کوروناویروسلا مبارزه چرچیوه‌سین‌ده، تمیزلیک، ماسک و مسافه قایدالارینا اویماق شرطی ایله، قوناقلاما تاسیسلرین‌ده‌کی قیسیدلاما و تدبیرلره سون وئریله‌جک.
یئمه-ایچمه یئرلرینین آچیق و قاپالی ساحه‌لرین‌ده عینی آندا اوتورابیله‌جک انسان ساییسی قیسیدلانمایاجاق.
نکاح، توی مراسیملرین‌ده، قاپالی یئرلر اوچون تطبیق اولونان قاتیلیمچی قیسیدلاماسینا گئدیلمه‌یه‌جک، یئمک ایچمک وئریله‌بیله‌جک.
کونسرت، فستیوال، گنجلیک کمپی کیمی فعالیتلره، تعیین اولونان اساسلارا اویولما‌سی شرطی ایله ایجازه وئریله‌جک.
بنگلادش، برزیل، گونئی آفریقا، هیندیستان، نپال و سری لانکادان تورکیه‌یه گلن شخصلر ایله سون ۱۴ گون‌ده بو اؤلکه‌لرده اولان شخصلره قارشی ضروری قرنطینه قالدیریلیر. بو شخصلرین تورکیه‌یه گیریش‌دن ان آز ۷۲ ساعات اؤنجه ائدیلمیش منفی نتیجه‌لی پی‌سی‌آر تست راپورو یئترلی اولاجاق.
افغانستان و پاکستان‌دان تورکیه‌یه گلن شخصلر ایله سون ۱۴ گون‌ده بو اؤلکه‌لرده اولان شخصلرین مجبوری قرنطینه‌لرینین مدتی ۱۰ گونه ائندیریله‌جک. قرنطینه‌نین ۷.جی گونون‌ده تطبیق اولونان پی‌سی‌آر تستینین منفی چیخماسی حالین‌دا مجبوری قرنطینه سونلاندیریلاجاق. پی‌سی‌آر تستینین مثبت چیخماسی حالین‌دا ایسه ساغلیق باخانلیغینین کووید-۱۹ قانونو ایستیقامتین‌ده حرکت ائدیله‌جک.
