اوروپا بیرلیگی بعضی بیردفعه‌لیک پلاستیک قابلاشدیرمالاری قاداغان ائدیر

اوروپا پارلمانی اوروپا بیرلیگی اؤلکه‌لرینده آتیقلاری/زیبیللری آزالتماق اوچون بعضی بیردفعه‌لیک پلاستیک قابلاشدیرمالاری قاداغان ائدن قانونو تصدیقلَییب.

فرانسه‌نین استراسبورگ شهرینده کئچیریلن اوروپا پارلمانی باش قورولو جلسه‌سینده قابلاشدیرمانین آزالدیلماسی، تکرار ایستیفاده‌سی و تکرار اعمالی ایله باغلی یئنی قایدالاری احتیوا ائدن قانون 476 «اولار» سسی ایله قبول ائدیلیب.

موافیق اولاراق، اوروپا بیرلیگینده قابلاشدیرمانین داها داواملی اولماسی و قابلاشدیرما آتیقلارینین آزالدیلماسی اوچون یئنی تدبیرلر گؤروله‌جک.

عمومی قابلاشدیرما و پلاستیک قابلاشدیرما آتیقلاری 2030-جو ایله قدر 5 فائض، 2035-جی ایله قدر 10 فائض، 2040-جی ایله قدر ایسه 15 فائض آزالاجاق.

2030-جو ایلدن اعتباراً اوروپا بیرلیگینده بیردفعه‌لیک پلاستیک قابلاشدیرمانین بعضی نووعلری قاداغان ائدیله‌جک. بو چرچیوه‌ده ایشلنممیش تزه میوه و سبزه قابلاشدیرماسی، کافه و رستورانلاردا دولدورولموش و ایستهلاک ائدیلن غذا و ایچکیلرین قابلاشدیریلماسی، تک پورسیون اوچون سُسلار، خاما و شکر پورسیونلاری، توالت لوازیماتلاری، یاشاییش یئرلرینده مینی شامپو و صابون قابلاشدیرماسی و ۱۵ میکرون آلتینداکی چوخ یونگول پلاستیک توربالار داخیل اولاجاق.

غذا ایله تماسدا اولان قابلاشدیرمادا « PFAS» کیمی تانینان «طبیعتده پوزولمایان داواملی کیمیوی ماده‌لرین» معین حدن آرتیق ایستیفاده‌سی‌ ده قاداغان ائدیله‌جک.

2029-جو ایله قدر بیردفعه‌لیک پلاستیک و متال ایچکی قوتولارینین 90 فائضی آیریجا ییغیلمالی و تکرار اعمال ائدیلمه‌لیدیر.

یئنی قایدالار عضو اؤلکه‌لرین تصدیقیندن سونرا قووه‌یه مینه‌جک.