Törkiyä-Afrika iq’tisad häm êş forumı atnakiçen ütkäreläçäk
Törkiyä-Afrika iq’tisad häm êş forumınıñ öçençese İlbaşı Räcäp Tayyip Ärdoğan qatnaşuında häm Säwdä ministrı Mäxmät Muş räislegendä pänceşämbe könne İstanbulda başlana
Säwdä ministrlığınnan yasalğan belderügä kürä, forumda 41 ildän 250 keşelek räsmi wäkillekneñ kilüe kötelä.
Yuğarı däräcäle qatnaşuçılar arasında Kön’yaq Sudan İlbaşı urınbasarı doktor James Wani Igga belän 29 ministr häm 8 ministr urınbasarı bar.
Forumda ayıruça 4 regional’ oyışmadan 2 başlıq qatnaşaçaq.
Forum qısalarında Törkiyä häm Afrika illäre arasındağı säwdä häm iq’tisad êlemtäläreneñ üsterelüe öçen yasalaçaq adımnar quzğatılaçaq "Törkiyä-Afrika urtaqlığın arttıru: säwdä, kapital salu, texnologiya häm logistika" temalı ministrlar cıyılışı uzaçaq.
Şuşı forum Törkiyädän häm Afrika illärennän yaqınça 2 meñ êşmäkärne cıyaçaq.
Forum qısalarında ayıruça Afrika irekle säwdä mäydanı, kapital salu, bank êşe, sälamätlek saqlaw häm xatın-qız liderlığı mäs’älälärendä üz ölkäsendä belgeç bulğan zatlar çığış yasayaçaq panellär, törek häm afrikalı êşmäkärlärne cıyaçaq ike yaqlı êşlekle söyläşülär belän säwdä häm investiśiya ölkäsendä Afrika illäre räsmiläre belän êşmäkärlär bergä qatnaşaçaq cıyılışlar ütkäreläçäk.
