İstanbulda “TRT İspan telendä söyläşüçe däwlätlärneñ berençe matbuğat sammitı” oyıştırıldı

Törkiyä ilbaşı apparatınıñ cämäğast’çelek belän êlemtä citäkçese Fäxrettin Altun İstanbulda oyıştırılğan “TRT İspan telendä söyläşüçe däwlätlärneñ berençe matbuğat sammitı”nda çığış yasadı. Ul tağın ber qat Ğazzädäge xällärgä iğ’tibarnı cälep itte.

Altun äytkänçä, Törkiyäneñ xaqsızlıqlarğa qarşı xaqıyqat’ne qıçqıruı häm ğadellekne yaqlawçı poziśiyäse İzrail şikelle yawız maqsatlarğa iyä törkemnärgä oşamıy. Ul İzrailneñ çınbarlıqnı böten dön’yağa işetterergä teläwçe jurnalistlarnı üterüen, şul räweşle xaqıyqat’ne yuq itüen, moña qarşı çığarğa kiräklegen assızıqladı.

Fäxrettin Altun “TRT İspança” sanlı xäbär platformasınıñ da bu tırışlıqlar belän bäyle buluın, anıñ xaqıyqat’ne êzläwne törle qıytğalarda, törle il häm cämğıyät’lärdä däwam itäçägen söyläde. Ul Törkiyä radio häm televideniye kompaniyäseneñ soñğı 2 yılda “TRT Franśuzça”, 3 törle teldä tapşıruçı “TRT Balkan”, 4 teldä söyläwçe “TRT Afrika”nı açuın xäterlätte. Älege sanlı xäbär kanallarınıñ qarawçı sanı qısqa waqıt êçendä 44 millionnı uzıp kitkän.

“Bez bu nisbättän “TRT İspança” belän xalıqara tapşıru mäydanında törlelekkä häm küp mädäniyatlı tapşırular fikerenä öleş kertäçäkbez, Törkiyäneñ tınıçlıq häm ğadellek yaqlı tışqı säyäsäten, xaqlı fikerlären tağın da kübräk keşegä añlatu mömkinlegenä iyä bulaçaqbız, ilebezneñ iq’tisadi, mädäni häm keşe potenśialın tağın da nıgraq kürenäçäk xälgä kiteräçäkbez häm bik küp Latin Amerikası ile belän qorğan duslıq küperlären köçäytäçäkbez”,-dide Törkiyä ilbaşı apparatınıñ cämäğast’çelek belän êlemtä citäkçese Fäxrettin Altun.