د تورکیې د بهرنیو چارو وزیر جرمني‌ ته سفر کوي

د تورکیې د  بهرنیو چارو وزیر هاکان فیدان به د اروپایی اتحادیې  د پراختیا په اړه د وزیرانو په کنفرانس کې د ګډون لپاره د آلمان پلازمینې برلین ته ولاړ شي.

د بهرنیو چارو وزارت په خبرپاڼه کې راغلي،

"زموږ د بهرنیو چارو وزیر ښاغلی فیدان  به د اروپايي اتحادیې د پراختیا او اصلاحاتو په اړه د بهرنیو چارو وزیرانو په کنفرانس کې  چې د جرمني د فدرال بهرنیو چارو وزارت په کوربه توب د نوامبر په دویمه په برلین کې جوړیږي پدې کنفرانس کې ګډون وکړي.د ویلو ده چې پدې کنفرانس کې  د اروپایي اتحادیې غړيو هیوادونو سربیره غړیتوب ته نوماند هیوادونه هم بلل کیږي. پدې کنفرانس کې به  د اروپايي اتحادیې د پراخوالي  پر ستراتیژۍ هم خبرې وشي.

په بیان کې دا هم ویل شوي چې وزیر فیدان به له کنفرانس مخکې د جرمني د بهرنیو چارو له وزیرې انالینا بیربوک سره دوه اړخیزه غونډه وکړي او د کنفرانس په څنډه کې به له خپلو ځینو سیالانو سره هم خبرې وکړي.