د تورکیې  ولسمشر رجب طیب اردوغان د پاکستان لومړي وزیر شهباز شریف تسلیت مراتب وړاندې کړل

د تورکیې  ولسمشر رجب طیب اردوغان د پاکستان لومړي وزیر شهباز شریف ته خواخوږي څرګنده کړه.

د ولسمشرۍ ماڼۍ د عامه اړیکو د ریاست لخوا په خپره شوې خبرپاڼه کې ویل شوي، اردوغان له شریف سره ټیلیفوني خبرې وکړې.

په دې ټیلیفوني خبرو کې اردوغان د پاکستان له هغو اتباعو سره خواخوږي څرګنده کړه چې د یونان په سواحلو کې د مهاجرو د کښتۍ د ډوبیدو له امله خپل ژوند له لاسه ورکړی دی.

ولسمشر اردوغان په دې غمجنه پیښه د ژورې خواشینۍ په څرګندولو سره وویل چې د پاکستان د خلکو په درد کې ځان شریک بولو.

د جون په ۱۴مه د یونان په سواحلو کې د مهاجرو د کښتۍ د ډوبیدو له امله ۸۱ تنو ناقانونه کډوالو  خپل ژوند له لاسه ورکړ او ۱۰۴ تنه یې وژغورل شول.

په وژل شویو کې د سوریې، مصر، پاکستان او فلسطین اتباع هم شامل دي.