د اسلام فوبیا یا اسلام دښمنۍ پر خلاف د مبارزې په برخه کې  یو ډیر مهم ګام

د نوموړو  درې هیوادونو مشرانو  د اسلام دښمنۍ پر خلاف د لا ښې مبارزې او عامه پوهاوي په خاطر  د ګډ تلویزیوني  کانال د جوړولو  پریکړه وکړه.

د ترکیې ولسمشر رجب طیب اردوغان، د مالیزیا لومړي وزیر مهاتیر محمد او د پاکستان لومړي وزیر  عمران خان  په نیویارک ښار کې  د ملګروملتونو د کلنۍ اسمبلۍ  په چوکاټ کې  درې اړخیزه غونډه وکړه.

د  پاکستان لومړي وزیر  عمران خان د غونډې نه وروسته د ټولنیزې مډیا له لارې  د پيغام په خپرولو سره  د کډ تلویزیوني کانال د جوړولو  د تصمیم نیولو نه خبر ورکړ.

هغه په خپور کړي پیغام کې ویلي دي چې « د ولسمشر اردوغان او لومړي وزیر مهاتر سره  مو په ننۍ درې اړخیزه  غونډه کې  د اسلام فوبیا یا اسلام دښمنۍ  پر خلاف د لا ښې مبارزې او د اسلام د سپڅلي دین په اړه  د غلطو او ناسمو معلوماتو  د اصلاح  او مخنیوي  په خاطر  په انګلیسي  ژبه  د یو ګډ تلویزیوني  کانال د جوړولو پریکړه وکړه.»

عمران خان  ویلي دي چې  ددې لارۍ څخه  به  د اسلام او مسلمانانو پر خلاف د رامنځته شوو ناسمو اذهانو او معلوماتو  د اصلاح  او لمنځه وړو  په خاطر  قوي مبارزه وکړو.  ددې تلویزیوني  کانال  له لارې به خلکو ته  د دیني ارزښتونو په اړه  سم  معلومات ورکړل شي  ، د سمو معلوماتو ورکولو  او روزنې په موخه به د مسلمانانو د تاریخ بیانوونکي  فلمونه او ډرامې  تولید  نړۍ ته  وړاندې شي.