د اوکراین ولسمشر سعودي عربستان ته سفر کړی

د اوکراین ولسمشر ولادیمیر زیلینسکي د سعودي عربستان له ولیعهد محمد بن سلمان سره لیدنه وکړه.

د سعودي عربستان د خبري اژانس  د خبر له مخې، زیلینسکي او ورسره مل پلاوي ته د پلازمېنې ریاض د ملک خالد نړیوال هوايي ډګر کې د ریاض سرپرست شهزاده محمد بن عبدالرحمن بن عبدالعزیز لخوا هرکلي وویل شو.

العربیه ټلویزیوني چینل اعلان کړی چې زیلینسکي د خپل سفر په ترڅ کې له ولیعهد شهزاده محمد بن سلمان سره ولیدل.

د يادونې وړ ده، چې په دې لیدنه کې د دوه اړخيزو اړيکو پر پياوړتيا او د روسيې او اوکراين د کړکېچ د حل لپاره د همکاريو پر پياوړتيا او د مذاکراتو پر فرصتونو خبرې وشوې.

زیلینسکي د تیر کال د می په میاشت کې هم  سعودي عربستان ته تللی و.

ریاض د روسیې او اوکراین ترمنځ د کړکیچ په هوارولو او د بندیانو په تبادله کې رول لوبولی دی.

د روسیې د ولسي جرګې د دولتي دوما مشر ویاچسلاو ولادین هم تېره ورځ په ریاض کې له ولیعهد محمد بن سلمان سره لیدنه کړې وه.

اوکراین هڅه کوي چې د سعودي عربستان ملاتړ هم ترلاسه کړي.