د پولنډ لومړي وزیر ویلي دي چې په هیواد کې د اعدام د سزا د بیا پیلیدو ملاتړ کوي.

د پولنډ لومړي وزیر ماتیوس موراویڅکي ویلي دي چې په هیواد کې د اعدام د سزا د بیا پیلیدو ملاتړ کوي.

موراویڅکي، چې په خپل فیسبوک پاڼه کې   د پوښتنو او ځوابونو یوه غونډه جوړه کړې وه، د ښاریانو پوښتنو ته ځوابونه وویل.

موراویڅکي وویل چې هغه د اعدام د سزا په اړه د کلیسا له  نظر او لید سره موافق نه دی. "زه فکر کوم چې پدې مسئلې په ټولیزه توګه باید له سره غور وشي. د ډیرو جدي جرمونو لپاره باید د مرګ سزا ورکړل شي."

په پولنډ کې د مرګ سزا په ۱۹۹۸ کال کې لغوه شوه. تر ټولو وروستی اعدام شوی کس اندریز کازابانسکي و، چې د ۱۹۸۸ کال  په اپریل میاشت کې په  یوې ښځې د جنسي تیري او وژلو او د هغې د دوو لوڼو د وژلو د هڅې په تور اعدام شو.

په پولنډ کې ډیری سیاسي ګوندونه د اعدام د سزا له بیا پیل سره مخالفت کوي، خو د واکمن قانون او عدالت ګوند ځینې غړي د اعدام د سزا د بیا پیلولو ملاتړ کوي.