روسیې امریکا ته خبرداری ورکړ

وروسته له هغه چې امریکا اوکراین ته اضافي پوځي مرستې واستولې، روسیې امریکا ته سخت خبرداری ورکړ. روسیې امریکا ته خبرداری ورکړ چې ډول کړنې د مخامخ جګړې لامل کیدای شي.

په واشنګټن کې د روسیې سفیر، اناتولي انتونوف وویل چې دا د روسیې لپاره "څرګند ګواښ" دی.

انتونوف د امریکا متحده ایالتونو په جګړه کې د ښکیلتیا په تورنولو سره وویل: "مونږ پر واشنګټن غږ کوو چې خپلو پارونکو کړنو ته د پای ټکی کېږدي چې کیدای شي خورا جدي پایلې ولري."

د امریکا د دفاع وزارت د سه شنبې په ورځ اعلان وکړ چې له اوکراین سره به ۶۲۵ میلیونه ډالره اضافي پوځي مرسته وکړي.

د امریکا دفاع وزارت ویلي دي چې ددې مرستو په چوکاټ کې به اوکراین ته ۴ لوړ ظرفیت لرونکي هیمارس راکټ اتار سیتمونه او ۱۶ هم هاویزر توپونه شتون لري.

امریکا د فبرورۍ په  ۲۴د روسیې  لخوا پر اوکراین د بریدونو  له پیل راهیسې اوکراین ته د شاوخوا ۱۷ میلیارد ډالرو نظامي مرستې ژمنه کړې.

د ویلو ده چې د روسیې لخوا د نیول شوو سیمو د بیرته نیولو لپاره د اوکراین په وروستیو عملیاتو کې د امریکا وسلو مهم رول درلود.

په داسې حال کې چې د اوکراین پوځ اعلان وکړ چې په ټولو هغو سیمو کې یې د پام وړ پوځي لاسته راوړنې لرلې چې تېره اوونۍ یې روسیې سره یوځای کړې وې، د کرملین ویاند دیمیتري پیسکوف ویلي چې دوی به هغه ځمکې بېرته واخلي چې اوس ترې وتلي دي.

پیسکوف د خبریالانو پوښتنو ته په ځواب کې وویل: "دا سیمې به بیرته ونیول شي او د تل لپاره به د روسیې سره تړاو ولري."

د روسیې ولسمشر ولادیمیر پوتین تېره اوونۍ اعلان وکړ چې د اوکراین د خرسون، زاپورزیه، دونیتڅک او لوهانسک سیمې په رسمي توګه له خپلې خاورې سره یوځای کړي دي.

د اوکراین په ختیځ او سویلي سیمو کې په څلورو سیمو کې په جنجالي ټولپوښتنه کې، لوی اکثریت له روسیې سره یوځای کیدو ته رایه ورکړه.

د اوکراین پوځ اعلان وکړ چې پوځیان یې د هېواد په جنوب کې د نیپر سیند په لویدیځ کې پرمختګ ته دوام ورکوي او په شمال لویدیځ کې یې خپلې پوستې پیاوړې کړې دي. د اوکراین ولسمشر ولادیمیر زیلینسکي ویلي، پوځ د پام وړ پرمختګ کړی، په تېره بیا په خرسون کې.

ویل کیږي چې د بیرته نیول شویو ځمکو په منځ کې د خرسون په سیمه کې یو کلی دی چې ویل کیږي ستراتیژیک اهمیت لري، او بیا دلته د اوکراین بیرغ پورته شوی.

د لوهانسک سیمې اداري چارواکي سري هیداي په ټیلیګرام کې په خپل پیغام کې ویلي چې دوی په لوهانسک کې پرمختګ کړی او ویلي یې دي چې له نیواک څخه د لوهانسک د پاکولو بهیر پیل شوی دی.