Фидан : «Нетаньяхунун бийликте калуу үчүн аймагыбызды согушка сүйрөөгө аракет кылганы анык»

Тышкы иштер министри Хакан Фидан : «(Израилдин премьер-министри Биньямин) Нетаньяхунун бийликте калуу үчүн аймагыбызды согушка сүйрөөгө аракет кылганы анык»,- деди.

Хакан Фидан расмий сапар менен барган Катарда премьер-министр жана тышкы иштер министри шейх Мухаммед бин Абдулрахман Аль Тани менен бирге маалымат жыйын өткөрдү.

Кесиптеши менен чөлкөмдөгү акыркы окуяларды талкуулагандыгын билдирген Фидан: «Биз Израилдин Газада кылган кылмыштарынын аймактык жаңжалга айланып кетүү коркунучу бар экенин башынан эле айтканбыз, күчөп кетүү жана жайылып кетүү ыктымалдыгы тууралуу эскерткенбиз»,-деди.

Фидан өткөн жуманын аягында болгон окуялардын (Ирандын Израилге абадан чабуулу) аймактын тышындагы өлкөлөрдү да камтыган согуш ыктымалынын өтө алыс эмес экенин бардыгына көрсөткөнүн белгилеп, бул тобокелдин дагы эле уланып жатканын белгиледи.

Окуялар баштала электе чыңалууну көзөмөлдөнгөн түрдө жеңүү үчүн катуу аракет кылгандарын белгилеген Фидан кээ бир жолугушуулар болгонун, бул аракеттер дагы эле уланып жатканын жана бардык тиешелүү тараптарды сабырдуулукка чакырган билдирүүлөрүн жеткиргенин айтты.

Министр Фидан региондон башка өлкөлөрдүн да окуяларга сабырдуу мамиле кылышы керектигин белгилеп : «Аймактык өлкөлөр катары биз үчүнчү тараптардын өз кагылышууларын бул географияга алып келишин каалабайбыз»,-деди.

Иран менен Израилдин ортосунда болгон окуялардын абдан маанилүү сабактарды ачыкка чыгарганына көңүл бурган Фидан : «Биринчиден, эл аралык укук ар бир адам үчүн милдеттүү. Глобалдык деңгээлдеги тынчтыктын жана ырааттуулуктун ачкычы эл аралык укуктун сакталышында жатат. Экинчиден, Нетаньяху бийликте калуу үчүн биздин аймакты согушка тартууга аракет кылып жатканы айдан ачык. Нетаньяхуну эч кандай шартсыз колдогондор тез арада позициясын кайра карап чыгышы керек. Үчүнчүсү жана эң негизгиси, окуялардын негизи Израилдин Газада кылган зордук-зомбулук жана зулумдуктарында жатат. Мен муну баса белгилегим келет: Учурда жабыртарткандар Израиль да, Иран да эмес. Жабырлануучулар Газа эли»,-деп айтты.

Тышкы иштер министри ошондой эле Газадагы апаатты токтотуу үчүн ар ким көбүрөөк аракет кылышы керектигин белгиледи.

Катардын премьер-министри жана тышкы иштер министри Аль Тани да Газадагы абалга көңүл буруп: «Түркиянын өзгөчө аймактагы гуманитардык трагедиянын бүтүшү үчүн ролу жана эффективдүүлүгү абдан маанилүү»,-деди.