Лукашенко: «Жаңжал же тең чыгуу менен аяктайт, же кыямат менен аяктайт»

Беларустун президенти Александр Лукашенко Украинада ок атышууда туңгуюкка кептелгенин жана тынчтык сүйлөшүүлөрү үчүн зарыл шарттар түзүлгөнүн билдирди. Лукашенко эгер Киев Москва менен келишимге макул болбосо, Украинанын аман калышына коркунуч жаралышы мүмкүн экенин кошумчалады.

Орус маалымат агенттиги ТАССтын кабарлашынча, Лукашенко «Эгер Киев сүйлөшүүлөргө макул болбосо, Украина мамлекет статусунан ажырайт» деп билдирген.

Беларусь лидери: «Бүгүн эч ким согушкусу келбейт, ошон үчүн биз тынчтыкка кайрылышыбыз керек, Зеленскийдин формуласы реалдуу эмес. Орусия өз жерлерине аннексияланган аймактарды таштабайт»,-деди.

Лукашенко сүйлөшүүлөрдүн согуштун алгачкы жумаларында Түркиядагы орус жана украин жетекчилеринин жолугушууларынын натыйжасында пайда болгон алдын ала документтерге таянып жүргүзүлүшү мүмкүн экенин айтты.

Андан тышкары Лукашенко Орусия Батыштын «коркунучтуу» аракеттерине каршы өзөктүк курал колдонсо, келип чыга турган «кыямат» коркунучуна көңүл бурду. Орус бийликтери Украинаны колдоо Батышты Орусия менен түз жаңжалга алып келип, өзөктүк жаңжалга алып келиши мүмкүн деп бир нече жолу билдирген.