O‘zbekiston Prezidenti Shavkat Mirziyoyev Turkiya vitse-prezidentini qabul qildi

O‘zbekiston Prezidenti Shavkat Mirziyoyev bugun, 28 iyun kuni amaliy tashrif bilan mamlakatda bo‘lib turgan Turkiya Respublikasi vitse-prezidenti Fuat O'ktayni qabul qildi.

Suhbat chog'ida ikki mamlakat amaliy hamkorligini yanada kengaytirish hamda yetakchi korxona va kompaniyalarning yangi kooperatsiya loyihalarini ilgari surish masalalari muhokama qilindi.

Davlat rahbari O‘zbekiston-Turkiya do‘stlik, ishonch va strategik sheriklik munosabatlarida oliy darajadagi muntazam va sermahsul muloqot tufayli erishilgan bugungi darajani yuksak baholadi.

O‘z navbatida, vitse-prezident Fuat O'ktay samimiy qabul uchun O‘zbekiston yetakchisiga minnatdorlik bildirdi hamda Turkiya Prezidenti Rajap Tayyip Erdo'g‘anning samimiy salomi va eng ezgu tilaklarini yetkazdi. Turkiya kompaniya va investorlarining O'zbekistondagi faoliyatiga ko‘rsatilayotgan katta ko‘mak uchun alohida minnatdorchilik bildirildi.

Uchrashuvda ikki tomonlama hamkorlikning rivojlanish sur’ati va pandemiya oqibatlarini yengib o‘tish borasida ko‘rilayotgan choralar alohida ta’kidlandi.

Xususan, yil boshidan turli darajalardagi almashinuv va muloqotlar faollashdi, o‘zaro savdo hajmi va qo‘shma investitsiya loyihalari soni muttasil ortib bormoqda. Bugun bo‘lib o‘tgan O‘zbekiston va Turkiya o‘rtasidagi Savdo-iqtisodiy hamkorlik bo‘yicha hukumatlararo komissiyaning 6-yig‘ilishi va biznes vakillari ishtirokidagi ishbilarmonlik dasturi yakunlari mamnuniyat bilan qayd etildi.

Toshkent shahrida o‘tadigan Strategik hamkorlik kengashi ikkinchi yig‘ilishining kun tartibini har tomonlama tayyorlash muhim ekani ta’kidlandi. Bular, eng avvalo, tovar ayirboshlash hajmi va kooperatsiya ko‘lamini oshirish, Preferensial savdo to‘g‘risidagi bitimni qabul qilish, qo‘shma sanoat zonasini tashkil etish, Turkiyaning ilg‘or tajribasi, bilim va texnologiyalarini faol jalb qilgan holda raqamlashtirish, ta’lim va iqtisodiyotning boshqa tarmoqlaridagi dasturlarni ilgari surish masalalaridir.

Mintaqaviy sheriklik va xalqaro tashkilotlar doirasidagi hamkorlikning dolzarb jihatlari yuzasidan ham fikr almashildi.