2 – nöwetlik istanbul maarip yighini axirlashti
türkiye maarip fondi teripidin chaqirilghan «2 – nöwetlik istanbul maarip yighini» axirlashti.
türkiye awazi radiyosi xewiri: türkiye maarip fondi teripidin TRT ning uchur - alaqe jehettin qollishi bilen chaqirilghan, 7 döletning maarip ministirliri we dunyaning herqaysi jayliridin maarip sahesidiki mutexessisleshken kespiy organlirini «mekteplerning kélechiki, ‹kowid – 19› yuqumidin kéyinki telim – terbiyege bolghan éhtiyaj» témisida bir yerge jem qilghan «2-nöwetlik istanbul maarip yighini» axirlashti. baghlarbashi qurultay we medeniyet merkizide chaqirilghan yighinning ikkinchi we axirqi künining tunji olturushida, «kowid ewladlirining kélechiki», ikkinchi olturushida bolsa, «özgiche maarip» témiliri muzakire qilindi.
yighinining axirqi olturushida, «maarip saheside tallash xaraktérlik izdinishler» témisi muhakime qilindi. istanbul medeniyet uniwérsitéti oqutquchisi dotsént doktor ömer awji riyasetchilikide ishqa ashurulghan olturushta, EdX soda tereqqiyat ishliri bölümining mesuli jon shwartiz, Coursera for Campus yer shariwi ishlar bölümining mesuli skot shiréman, marmara uniwérsitéti oqutquchisi piroféssor doktor kemal sayar, péshawar uniwérsitéti maarip jemiyetshunasliqi we oqutquchilar maaripi piroféssori seyyid munid ehmed, afriqa tereqqiyat uniwérsitétining mudiri qadir kanéy qatarliqlar nutuq sözlidi.
«baylar bilen namratlar otturisidiki perqni tügitiwatimiz»
«kowid – 19» yuqumidin kéyin maarip sistémisida birdinla tor maaripi modéligha ötülgenlikini eskertken EdX soda tereqqiyat ishliri bölümining mesuli jon shwartiz, bu sayida maaripning köp sanda sahege kéngeytilgenlikini tekitlep mundaq dédi: «silerning yéninglargha kélip, xarward we MIT ta oqughuchilargha bérilidighan dersler dunyadiki herqandaq kishige heqsiz bérilidu, désem, siler buninggha qandaq inkas qayturattinglar? bir ömür öginish ékologiyesi sistémisini hemme jayda, hemme hademge sunuwatimiz. bolupmu bu dangliq mekteplerge kireleydighan eqilliq we bay kishiler bilen kirelmeydighanlar otturisidiki perqni tügitiwatimiz. bügünki kündiki maarip sistémisida biz buni qobul qilishimiz, tereqqiy qilishimiz we buningdin yaxshi paydilinishimiz kérek.»
«üch hepte ichide milyonlighan oqughuchilar bir kunupkini bésipla tor maaripigha ötti.»
yiraq musapilik maaripning yüzturane maaripning ornini basalaydighan yaki basalmaydighanliqi mesilisi toghriliqmu toxtalghan shwartiz, mundaq dep körsetti: «men bu soalni özümdin nahayiti köp sordum. shundaq, bashqa tallash yolliri échildi. üch hepte ichide milyonlighan oqughuchilar bir kunupkini bésipla tor maaripigha ötti. ‹kowid – 19› yuqumi jeryanida buning mohimliqini tekitliduq. buni keynige sürgenlermu boldi. kishiler buning qandaq tereqqiy qilidighanliqini bilmeytti. chünki ular buning tesirini chüshenmeytti, ‹kowid – 19› yuqumi shundaq qorqunchluq ish bolsimu, emma algha siljish qedimimiz idi, dunyaning herqaysi jaylirida men tonuydighanlarning hemmisi melum shekilde tor maaripidin behrimen boldi.»
«tor maaripi nurghun sahelerde yaxshi wasitidur.»
Coursera for Campus yer shariwi ishlar bölümining mesuli skot shiréman bolsa, tor maariping muhimliqini tekitlidi.
tor maaripningmu paydiliq tereplirining barliqini eskertken shiréman, mundaq dédi: «tor maaripi nurghun sahelerde yaxshi wasitidur. birinchidin, maarip xizmiti sunidu. derweqe bu uniwérsitét oqughuchilirighimu paydiliq. chünki bu sizge ilgiri sunulup baqmighan qolayliqlarni yaritip béridu. tor maaripning qismen paydiliq terepliri bar. mesilen, yüzturane maaripqa sélishturghanda, tor maaripi téximu yaxshidur. jümlidin, bular bir - birini righbetlendüridighan we qollaydighan sistémilardur. nöwette biz oqughuchilarni nezerde tutqan halda hem yüztura hem tor maaripini tereqqiy qilduruwatimiz.»
yighin dairiside, türkiye maarip fondi teripidin chaqirilghan 3 – nöwetlik maarip foto süret musabiqisi mukapatliri tarqitildi. musabiqide, pakistandin shajar zehra birinchilikke, burundidin rania hesen ikkinchilikke, afghanistandin mustafa rejebi üchinchilikke érishti. mukapatqa érishkenlerge, mukapatlirini, türkiye maarip fondi ijraiye heyitining mesuli piroféssor doktor birol aqgün teqdim qildi.
