téslaning « Smodél» aptomobilida chataq körülgen

türkiye awazi radiyosi xewiri: tésla shirkiti 123 ming « Smodél»  aptomobilini qayturuwalidighanliqi toghrisida bayanat élan qildi.

shirketning xéridarlirigha ewetilgen bu heqtiki bayanatida, « Smodél» aptomobilining rolida körülgen chataq sewebidin 2016-yili apréldin burun ishlepchiqirilghan barliq « Smodél» aptomobillirining qayturuwélinidighanliqi bildürüldi.

bayanatta, soghuq témpératurada tuz chéchilghan yollardiki kaltisiy we magniyning « Smodél» ning rolining chishlirigha tesir körsitidighanliqi we buning töwen sürette mangghanda we toxtatqanda shopurni qiyin ehwalgha chüshürüp qoyidighanliqi qeyt qilindi.

mezkur mesile sewebidin bügüngiche héchqandaq tésla aptomobillirida weqe-hadise körülmigenliki eskertilgen bayanatta, téslaning xéridarliri bilen alaqiliship, kéreklik parchisini almashturidighanliqi bildürüldi.

bayanat élan qilinghandin kéyin, téslaning niyu york pay chéki bazirida sétiliwatqan pay chéki %4 töwenlep 255.55 dollargha chüshti.

tésla shirkiti buningdin burunmu oxshimighan sewebler bilen 140 ming aptomobilni qayturuwalghan bolup, 2017-yili qol tormuzidiki chataq sewebidin 53 ming dane Smodél we Xmodél aptomobilini, 2015-yili bolsa, bixeterlik tasmisida körülgen mesile sewebidin 90 ming Smodél aptomobilini qayturuwalghan idi.