tataristan iqtisadi türkiyening meblighi bilen yaxshi tereqqiy qiliwatidu

türkiye awazi radiyosi xewiri: jumhur reis rejep tayyip erdoghan külliyede tataristan pirézidéntini kütüwaldi. ikki rehberning körüshüshi jumhur reislik külliyeside axbaratqa yépiq shekilde ötküzüldi we texminen 40 minut dawamlashti. iqtisad ministiri nihat zeybekchi körüshüshte birge boldi.

tataristan pirézidénti minnixanow türkiye-tataristan soda-sanaet munbiri yighinigha qatnashti we söz qildi. u türkiyelik soda-sanaetchilerning tataristanda texminen 2 milyard dollarliq meblighi barliqini bildürüp: «tataristan iqtisadi türkiyelik soda-sanaetchilerning salghan meblighi sayiside barghanséri tereqqiy qiliwatidu» dédi.

u türkiye shirketlirining tataristanda ishlepchiqarghan mehsulatlarning peqet tataristan we rusiye tewesidila emes, belki bashqa döletlergimu éksport qilinidighanliqini éytti. u wiza resmiyetlirini emeldin qaldurush mesiliside, rusiyening enqerediki elchixanisi bilen ortaq xizmetlerni ishlewatqanliqlirini eskertip, köp qétimliq kirish-chiqish wiza usulining yaxshi tallash yoli ikenlikini qeyt qildi.

u awiyatsiye qatnishining ehmiyiti üstide toxtaldi we türk hawa yolliri shirkiti bilen körüshüp, ikki terepke heptining hemme künliri hawa sepiri bashlash telipini yetküzgenlikini eskertti.

tataristan jumhuriyiti sélinma tereqqiyat agéntliqining bashliqi taliya minullina, tataristangha sélinghan chet el meblighi ichide türkiyening aldinqi orunda turidighanliqini bildürdi. minullina bu heqte toxtilip: «meblegh mesiliside türkiyelik soda-sanaetchiler nahayiti téz qarar béridu we bu qararlar tézlikte emelge ashurulidu. mundaqche éytqanda, qarar bérish basquchi bilen ishlepchiqirishqa ötüsh basquchi arisidiki waqit nahayiti qisqa. türkiye bu mesilide, ishning ehlidur» dédi.

minullina meblegh sélishta, sehiye sahesige ehmiyet bériliwatqanliqini, néfit-ximiye, énérgiye we mashinsazliq qatarliq sahergimu meblegh séliniwatqanliqini bildürdi.