erdoghan berdimuhemmedow bilen körüshti

türkiye awazi radiyosi xewiri: jumhur reis erdoghan antalya diplomatiye munbirige qatnashqan dölet we hökümet bashliqliri bilen körüshüshni bashlidi.

türkiye jumhuriyiti jumhur reislik mehkimisi uchur – alaqe ishliri idarisining bildürüshiche, jumhur reis erdoghan bilen berdimuhemmedow türkiye-türkmenistan ikki dölet munasiwiti, rayon we dunyawi mesililer shundaqla israiliyening bigunah puqralargha qaratqan sistémiliq hujumliri toghrisida söhbetleshken.

erdoghan türkmenistan bilen her ikki döletke özara nep yetküzidighan özara qedemlerni tashlashni dawamlaturup,  ikki dölet otturisidiki soda sommisini 5 milyard dollarliq sewiyege yetküzüsh üchün tirishchanliq körsitish kéreklikini otturigha qoyghan.

u söhbet jeryanida, israiliyening yémeklik yardimi élishni kütüp turuwatqan puqralargha qilghan hujumini qobul qilghili bolmaydighanliqini, türkiye bilen türkmenistanning rayongha ewetilgen insanperwerlik yardimining miqdarini ashurush üchün hemkarlashsa bolidighanliqini bildürgen.

söhbet jeryanida yene, «tebiiy gaz sahesidiki hemkarliqni tereqqiy qildurush ramka kélishimi», «néfit we tebiiy gaz saheside hemkarliq ornitish iradisi xitabnamisi» we «türkmenistan awiyatsiye shirkiti bilen türkiye awiyatsiye orgini uniwérsitéti otturisidiki chüshinish kélishimi» qatarliqlar imzalanghan.

söhbettin ilgiri, jumhur reis erdoghangha tughulghan küni munasiwiti bilen türkmenistan teripidin «türkmen xelqining pexriy aqsaqili» unwani bérildi we ton sowgha qilindi. erdoghan gurbanguli berdimuhemmedowgha rehmet éytti.

jumhur reis erdoghan munber dairiside yene bulghariye pirézidénti rumén radéw bilenmu körüshti.

jumhur reislik mehkimisi uchur – alaqe ishliri idarisining bildürüshiche, jumhur reis erdoghan uchrishishta, türkiye bilen bulghariyening, bolupmu mudapie sanaiti we énérgiye sahesidiki hemkarliqni kücheytip, bashqa sahelerdiki munasiwetni tereqqiy qildurushning muhimliqini otturigha qoyghan.

u türkiyening bulghariye bilen tash yol arqiliq suyuqlandurulghan tebiiy gaz éksport qilish, tejribe almashturush we qayta hasil bolidighan énérgiye qatarliq sahelerde hemkarlishishqa teyyar ikenlikini bildürgen.

jumhur reis erdoghan körüshüshte, türkiyening meyli ukraina-rusiye, meyli israiliye-pelestin toqunushning rayongha kéngiyip kétishining aldini élishni aldinqi orungha qoyghanliqini, mesilini söhbet we tinchliq yoli arqiliq hel qilish üchün zor tirishchanliq körsitiwatqanliqini qeyt qilghan.