fidan miyunxénda muhim uchrishishlarni ötküzdi

türkiye awazi radiyosi xewiri: türkiye jumhuriyiti tashqi ishlar ministirliqi ijtimaiy taratqu supisi «X» tiki adrésida uchur hembehrilep: «ministirimiz xaqan fidan miyunxénda ezerbeyjan pirézidénti ilham eliyéw teripidin qobul qilindi» dédi.

fidan yene yawropa ittipaqining tashqi munasiwet we bixeterlik siyasiti boyiche aliy wekili josép borrél we moldawiye tashqi ishlar ministiri mixai popshoi bilen ayrim-ayrim söhbetleshti.

diplomatik menbelerdin igilengen uchurlargha asaslanghanda, borrél bilen körüshüp, türkiye-yawropa munasiwetliri toghrisida sözleshken fidan, yawropa ittipaqining bashqa kandidat döletlerge bir xil, türkiyege bashqa bir xil muamile qilmasliqi kéreklikini eskertken.

ghezze mesilisimu muzakire qilinghan söhbbet jeryanida, ichidiki pikir oxshimasliqlirining yawropa ittipaqining pelestinliklerni qollishigha éghir tosqunluq qiliwatqanliqi, ittipaqning israiliyege qarshi keskin pozitsiye bildürelmigenliki otturigha qoyuldi.

süriye mesilisimu muzakire qilinghan söhbet esnasida, her ikki terep süriye hakimiyitining siyasiy musapige qatnishishi kéreklikini tekitligen.

diplomatik menbeler yene, ministir fidanning moldawiye tashqi ishlar ministiri popshoi bilen körüshüp, iqtisadiy munasiwet, énérgiye, maarip we mudapie sanaiti qatarliq sahelerdiki hemkarliq mesililiri shundaqla kelgüsidiki yuqiri derijilik ziyaretler bilen türkiyening gagawuzgha qilghan yardemliri toghrisida sözleshkenlikini bildürdi.