түркийә 26 - февралда хәлқара сотта исраилийәниң ирқий қирғинчилиқи һәққидә доклат суниду
түркийә хәлқара сотниң испат аңлаш йиғинида, исраилийәниң пәләстиндики қилмишлири һәққидә доклат сунидиған болди.
түркийә авази радийоси хәвири: голландийәниң лаһәй шәһиридики хәлқара сотта исраилийәниң шәрқий қуддуста вә ишғалийәт астидики пәләстин земинида қилған қилмишлириниң қануний ақивәтлири һәққидә елип берилидиған мәслиһәт йиғинида сунидиған ағзаки доклатларниң вақит җәдвили елан қилинди.
буниңға асасән, түркийәниму өз ичигә алған 52 дөләттин башқа йәнә, әрәб әллири иттипақи, ислам һәмкарлиқ тәшкилати вә африқа иттипақи қатарлиқларниң һәр бири 19-февралдин 26-февралғичә болған арилиқта ағзаки доклат бериду.
исраилийәниң ишғалийәт астидики пәләстиндә қилған қанунсиз қилмишлириниң қануний ақивәтлири һәққидә түркийәниң ағзаки доклати 26 - феврал дүшәнбә күни елан қилиниду.
бирләшкән дөләтләр тәшкилати омумий кеңишиниң алаһидә сийасий вә мустәмликә комитети 2022-йили 30-декабирдики қарарида, хәлқара җинайи ишлар сот мәһкимисидин 1967-йилдики уруштин буйан исраилийәниң паалийәтлири нәтиҗисидә, пәләстинликләрниң өз тәқдирини өзи бәлгиләш һоқуқини рәт қилишниң қануний ақивәтлири һәққидә пикир байан қилишини тәләп қилған иди.
хәлқара җинайи ишлар сот мәһкимиси нурғунлиған дөләтләр оттурисидики талаш-тартишлиқ делоларға алақидар испатларни аңлаштин башқа йәнә, б д т органлири вә башқа алаһидә органларға чәкләш күчигә игә болмиған мәслиһәт пикирлирини суналайду.
хәлқара җинайи ишлар сот мәһкимиси 2004-йилдики мәслиһәт йиғинида, исраилийәниң пәләстиндә ишғал қиливалған районларда селивалған тамлириниң хәлқара қанунни айақ асти қилғанлиқ икәнликини оттуриға қойған иди.
