fidan: bixeterliki tehditke uchrawatqini israiliye emes, pelestinlikler we rayon döletliridur
türkiye jumhuriyiti tashqi ishlar ministiri xaqan fidan enqerening quddustiki muqeddes jaylarning himayichisi iyordaniye bilen kéngishishke ehmiyet béridighanliqini bildürüp: «biz her sahediki hemkarliqimizni téximu kücheytish ortaq iradisige igimiz» dédi.
türkiye awazi radiyosi xewiri: türkiye jumhuriyiti tashqi ishlar ministiri xaqan fidan ijtimaiy taratqu supisi «X» tiki adrésida tünügün (18-yanwar) emelge ashurghan iyordaniye ziyariti toghrisida uchur hembehrilep, özining iyordaniye paytexti ammanda padishah abdullah ikkinchi teripidin qobul qilinghanliqini we shahzade hesen bin talal hemde iyordaniye muawin bash weziri, qoshumche tashqi ishlar weziri eymen sefedi bilen körüshkenlikini bildürdi.
enqerening ottura sherq siyasiy jughrapiyeside muhim rol oynawatqan we quddustiki muqeddes jaylarning himayichisi bolghan iyordaniye bilen kéngishishke ehmiyet béridighanliqini tilgha alghan fidan: «biz her sahediki hemkarliqimizni téximu kücheytish ortaq iradisige igimiz» dédi.
fidan ghezzediki qirghinchliqqa xatime bérip, pelestinliklerning tégishlik igilik hoquq we bixeterlikke érishishige kapaletlik qilish üchün, iyordaniyelik mensepdéshi bilen diplomatik tirishchanliqlarni birlikte dawamlashturuwatqanliqlirini tekitlep: «shuni untup qalmasliq kérekki, bixeterliki tehditke uchrawatqini israiliye emes, eksiche pelestinlikler we rayon döletliridur. sépimizni mustehkem qilsaq, bu jehette ünüm hasil qilidighan qedemlerni tashlishimiz mumkin» dédi.
ministir fidan yene iyordaniyening méhmandostluqighimu minnetdarliq bildürdi.
