292 neper ghezzelik yaridar türkiyege élip kélindi

türkiye awazi radiyosi xewiri: sehiye ministiri faxrettin koja ijtimaiy alaqe hésabatida bu yil sehiye saheside qilinghan xizmetler we bérilgen mulazimetlerni öz ichige alghan bir sinni hembehirlidi.

sehiye ministirliqining israiliyening wehshiyane hujumi astida turiwatqan ghezzedin élip kélingen yarilanghanlargha munasiwetlik xizmetlergimu  orun bérilgen sinliq uchurida, ministirliqning 15 ayropilan we bir paraxotta liq tibbiy eslihe ewetkenliki hemde 20 jiddiy qutquzush aptomobili we ikki döletlik tibbiy qutquzush etriti (UMKE) aptomobilini ghezzege yolighanliqi bildürüldi.

sinda jemiy 292 bimar we 241 hemrahi bolup, jemiy 533 ghezzelikning dawalash üchün türkiyege élip kélingenliki, rayongha yene toluq eslihelik köchme doxturxana, générator, asasliq turmush lazimetlikliri we dorilarning ewetilgenliki uqturuldi.