türkiye israiliyening ghezzede b d t gha tewe mektepke qilghan hujumini qattiq eyiblidi

türkiye awazi radiyosi xewiri: türkiye tashqi ishlar ministirliqining bayanatida, israiliyening ghezzede b d t pelestinlik panahlanghuchilargha yardem bérish orgini (UNRWA) gha tewe elfaxura mektipige qilghan hujumida onlighan bigunah pelestinlik kichik balilarni öltürgenliki we buni eng küchlük shekilde eyibleydighanliqi bildürüldi.

bayanatta, israiliyening bu hujumining ghezzede biwaste puqralarni, bolupmu kichik balilarni qesten we wehshilerche hujum nishani qilghanliqining yene bir ispati ikenliki eskertilip, «ghezzede mushu besh heptide israiliyening qanliq qolida hayatidin ayrilghan ayallar we kichik balilarning sani insaniyetke nisbeten bir numus menbesidur. israiliyening sadir qiliwatqan bu éghir jinayetliri bilen qanunni we barliq insaniy qimmet qarashlarni ayaq asti qilishigha xelqara jemiyet emdi köp köz yummasliqi lazim» déyildi.

bayanatta yene mundaq déyildi:

«insaniyet tarixigha hazirdin bashlapla qara daghlarni chüshürgen bu qirghinchiliqqa mesul kishiler, peyda qilghan teswirligüsiz azablar üchün adalet aldida choqum jawabkarliqqa tartilidu. ghezzede derhal shertsiz we menggülük urush toxtitishni élan qilish shert boldi. xelqara jemiyetning her bir wijdanliq ezasini bu heqte zörür bolghan qedemlerni tashlashqa chaqirimiz»

israiliye qisimliri ghezze rayonining shimalidiki jibaliye panahlanghuchilar lagérida b d t pelestinlik panahlanghuchilargha yardem bérish orgini (UNRWA) gha tewe nughun puqralar panahliniwatqan elfaxura mektipini shundaqla ghezzening shimalidiki beyt lahiye rayonidiki tel ez zater mektipini bombardiman qilghan idi.  

israiliyening hujumida nurghun puqraning qaza qilghanliqi we yarilanghanliqi xewer qilinghan hemde mektep karidorida qalghan jesetlerni chiqirishtimu  zor qiyinchiliqlar yüz bergenliki uqturulghan idi.