türkiye atatürk wapatining 85 - xatire yilini tebriklimekte

türkiye awazi radiyosi xewiri: herbiy we siyasiy talanti bilen ismini türk we dunya tarixigha altun herpler bilen yazdurghan mustapa kamal atatürk, 1938- yili 11 - ayning 10- küni istanbul dolmabahche sariyida alemdin ötti.

türkiye jumhuriyitining qurghuchisi mustapa kamal atatürk wapat bolghanliqining 85 yilliqi pütün türkiyede, shimaliy qibris türk jumhuriyitide we türkiyening chet ellerdiki elchixanilirida murasim we paaliyetler ötküzülüp xatirilinidu.

paaliyetler dairiside, dölet erbabliri paytext enqerediki atatürk xatire sariyi — anitqabirni ziyaret qildi.

jumhur reis rejep tayyip erdoghan bashchiliqidiki wekiller ömiki atatürkning meqberisige gülchembirek qoydi.

erdoghan atatürk xatire sariyi alahide deptirige köngül sözlirini izhar qilip: «hörmetlik atatürk, wapat bolghanliqingizning 85 – xatire yilida yene bir qétim sepdashliringizni, wetinimiz üchün jénini pida qilghan qehriman shéhitlirimizni we oxshash ghaye yolida qénini éqitqan ghazilirimizni séghinish ichide eslewatimiz. türkiyening qed kötürüshige, türkiye esirining qurulushigha we xelqimizning esirlik nishaanlirigha héchqandaq küch tosqunluq qilalmaydu» dep yazdi.

türkiye büyük milliy mejlisi bashliqi numan qurtulmush anitqabirda ötküzülidighan resmiy murasimgha we jumhur reislik mehkimisidiki xatirilesh pirogrammisigha qatnishidu.

numan qurtulmush türkiye jumhuriyitining qurghuchisi ghazi mustapa kemal atatürkning wapat bolghanliqining 85 yilliqi munasiwiti bilen télégramma tarqatti.

qurtulmush özining ijtimaiy alaqe supisidiki adrésida élan qilghan télégrammisida: «türkiye büyük milliy mejlisining birinchi reisi, jumhuriyitimizning qurghuchisi ghazi mustapa kamal atatürkni wapat bolghanliqining 85 yilliqida hörmet bilen xatirileymiz. rohi shad bolsun! söyümlük wetinimiz üchün janlirini pida qilghan barliq shéhitlirimizning, we alemdin ötken pütkül ghazilirimizning maqamliri üstün, makanliri jennet bolsun» dégen ibarilerge orun  berdi.

muawin jumhur reis jewdet yilmazmu ijtimaiy taratqudiki adrésida uchur hembehrilep, atatürkni hörmet bilen eslidi.

jewdet yilmaz wetinini qoghdash yolida janlirini pida qilghan barliq shéhitler we ghazilardin minnetdar ikenlikini qeyt qildi.

tashqi ishlar ministiri xaqan fidanmu özining ijtimaiy taratqudiki adrésida uchur hembehrilep: «men bu munasiwet bilen, milliy tashqi siyasitimiz bilen dölitimizning igilik hoquq we musteqilliqini kücheytish iradiimizni bir qétim tekitleymen. ghazi mustapa kamal qatarliq azadliq urushimizning barliq qehrimanlirini séghinish we minnetdarliq bilen esleymen» dédi.

türkiye jumhuriyiti jumhur reislik mehkimisi uchur – alaqe ishliri idarisi bashliqi fahrettin altunmu ijtimaiy taratqudiki adrésida atatürkni yad étip: «bizge bu zéminlarni weten qilip bergen barliq qehrimanlirimizni minnetdarliq bilen esleymen» dédi.

diniy ishlar bashqarmisimu télégramma tarqitip, wapatining 85 yilliqi munasiwiti bilen ghazi mustapa kamal atatürkni xatirilidi.

bashqarmining 10 – noyabir atatürkni xatirilesh küni munasiwiti bilen tarqatqan télégrammisida, qurulushining 100 – yiligha qedem basqan jumhuriyetning qurghuchisi ghazi mustapa kamal atatürkning wpatining 85 yilliqi munasiwiti bilen hörmet we minnetdarliq bilen xatirilengenliki qeyt qilindi.

télégrammida: «zor qurbanliqlar bedilige qolgha keltürülüp bizge amanet qilinghan jennet wetinimiz we qimmet – qarishimizni kücheytken halda kelgüsige yüzlendürüshni qehriman ejdadlirimiz we shanliq tariximiz aldidiki burchimiz dep qaraymiz. shereplik ötmüshning ewladliri bolush süpitimiz bilen, bizning bügünki wezipimiz medeniy qimmet qarishimizni eslige keltürüsh, dölitimizning mewjutluqi we millitimizning parawanliqi üchün, pütün küchimiz bilen tiriship, ejdadlirimizning sap mirasini kelgüsige yetküzüshtur» dégen ibarilerge orun bérildi.