rak késilige giriptar bolghan pelestinlik balilar türkiyede dawalinidu

türkiye awazi radiyosi xewiri: sehiye ministiri fahrettin koja türkiye büyük millet mejlisi (parlaménti) de qilghan sözide, pelestinde dawalash ishliri yérim qalghan pelestinlik rak bimarlirining türkiyege élip kélinidighanliqini éytti.

ministir koja bu heqte israiliye sehiye ministiri bilen téléfonda körüshkenlikini, uninggha herqandaq shekildiki zorawanliqni qobul qilghili bolmaydighanliqini éniq otturigha qoyghanliqini eskertti.

u, sehiye xizmitining izchilliqigha kapaletlik qilalmasliqning héchqandaq izahati yoqluqi toghrisida israiliye sehiye ministiri bilen ortaq tonush hasil qilghanliqlirini tekitlep mundaq dédi:

«téléfon söhbitimizde, israiliye sehiye ministirigha,  türkiye-pelestin dostluq doxturxanisining ghezzede rak késelliklirini dawalap kéliwatqan birdinbir doxturxana ikenlikini, sharait yar bermigenliki üchün, buningdin kéyin mulazimet qilalmaydighanliqini bayan qildim.»

koja israiliye sehiye ministirigha, israiliyeningmu bigunah balilargha dawamliq dawalinish sharaiti yaritip bérish mesuliyiti barliqini xatiriletkenlikini eskertip mundaq dédi:

«israiliye sehiye ministirigha,  balilarni öz ichige alghan bimarlarni qutquzush aptomobilliri bilen misirgha, u yerdin qutquzush ayropilanliri bilen türkiyege keltürüp dawalashqa teyyar ikenlikimizni bayan qildim. rak késilige giriptar bolghan pelestinlik balilarni öz ichige alghan rak bimarlirini eng qisqa waqit ichide türkiyege élip kélishke bashlaymiz.»

u yene bügün yolgha chiqidighan paraxot arqiliq dora, dawalash üsküniliri, 8 dala doxturxanisi, 20 qutquzush aptomobili we dawalash matériyalliri qatarliq 500 tonna tébbiy yardem eslihelirini rayongha yetküzüp béridighanliqlirinimu sözlirige ilawe qildi.